NyagaceemScapin Nakileem03 Nakila01

Teliz mal Wikikrenteem.

Grablé kal exulera, aneyara

Nyagaceem ke Scapin


Bareaf nakileem, taneafa nakila

Silvestre : En, winaf fertik sinton al gorad da belcon di tic ; ise va sinafa benplekura verkav.

Hyacinthe : Mana benplekura vol tir plinafa. Va mana dositikinda daavon kazawá ; ise kotinde askití enide nuca tisa wal korik cinon renan den cin di malpler.

Zerbinette : Va drageks nalé, ise me tí kontan dimefis viele non zo dilfú.

Scapin : Ise viele renon zo dilfur ?

Zerbinette : Icde rena, arcoba : arpuma loeke tir nume leeke tí laof.

Scapin : Folí, re til bene jinaf feliik ; ise coba inon askiyina mu rin gobristur da va inafa renapa di dulzackal.

Zerbinette : Ware laninde dirnú ; voxe batcoba inon askiyina va jin me kotinde ravaldar. Aflicepé ise dun kipé ; vexe kipeson, zavzá gorestaf icde lanyon uum ; ise rinaf feliik va int co-rofaver ede folir da lustera va jin, va varafa dikira va jin staper. Batcoba va arcoba lodam erba gotapiler ; ise ta dulzara va inafa renara inde in djumer, va folirawazdera do lanyona adrafa fipta gu in gokazawá.

Scapin : In va batcoba milinde gildar. Va rin anton karon ise poron espur ; ise ede arinde al trakuyur pune va bata arienta me co-fornayá.

Zerbinette : Va batcoba djufolí larde kalil ; vexe icde gadikye, va tatcera abdiwí.

Scapin : Va mergil trasití enide va coba di vandelvejá.

Hyacinthe : Vektara ke jinafi bali isu rinafi ware goweber da minafa nuca di koblir ; ise, rin is jin, tit milinde kivas, wonan gu mila volfala.

Zerbinette : Va bat gunt dadil, icle, grupeson vey toktan al koblil ; ise surimara ke rinaf gadikeem va batcoba roverkar, va rinafa kaluca roravaldar, ise va atoena abdikurera rofiner. Vexe luxe jin, ta intafa rotira va meka grelera trasí, ise jinaf win sok, va kuranira ke lane gadikye anton krafiase va kiewuca, me tuzijnatar.

Hyacinthe : Voxe va lan gunt dadil. Gan rinaf renanik anton zo zoel.

Zerbinette : Betawera ke takra ke fertik me tir tela gokivana coba. Kontan efe rofolir da va videra va intaf levrotinik riwecker ; ise tel kalkivaks ke manyona arienta tir, sedme jin, gadikyefa gijarotiuca, lenteon riwedarapa mekon sozanudar.

Hyacinthe : Kax ! Tokdume kona malyafa pestaka tire zo sotsuner ? Renara tir krenugaca viele meka lirkara va mana neciafa roda wale toloya takra me tir !

Scapin : Balgel : auluca koe renara tir meplinafa vumeltaca ; azekackafa kalaca sotuvrokawer ; remi blira ontinaca is omaca gotid ; ise arge rem bifa va lujuca sodivmodad, va puve solaumasid.

Zerbinette : Lorik ! Scapin, va rinafa fopuvesa suzenkara va levimpara va erba gu totcidaf guazik pwadeckel, vay ! Grupel, reizura sometir drasuna zegara nume va trasine puve daavapon sododé.

Scapin : Silvestre artlanir. Lion dam jim vaon verkatar. Koe taka va jaxadarama sú nume va inafe puve fu grivuté.

Silvestre : Tokdume, itupon, va yona arientaja gu int djuvanimpal ?

Scapin : Va xuyavosara djukayová.

Silvestre : Pu rin al ixam kalí, va rinafa erava co-jovlel ede va jin co-djufolil.

Scapin : Efe vexe battode va int co-folí.

Silvestre : Xum ! Gu tokcoba va int fu relandel ?

Scapin : Xum, va tokcoba zegal ?

Silvestre : Rabaté da, meolegason, va peyarapa fu laxuvanimpal.

Scapin : Ex kle ! Stale jinafe ge volsu rinafe.

Silvestre : Ae, til disik va rinaf epiteem nume djumeson daditil.

Scapin : Mana iyelinda va jin me sokazavzar, ise va mana nyukafa takra abdiwirsisa num mopoyensesa sobogá.

Zerbinette : Va rinafa skudara olegatat.

Scapin : Lanic ! Fure kazokeveté ! Metan meestenon rokalitir da va int volins relmeté ike va yona megogrupena birga kosmatá.

  Xanto  
Vergumvelt Les Fourberies de Scapin
Sutesik Jean-Baptiste Molière
Piskura -
Ava Francava
Evla 1671
  Kalkotavara  
Vergumvelt Nyagaceem ke Scapin
Kalkotavasik Staren Fetcey
Piskura -
Evla 2006-2013
Klita Kalkotavaks
  Krentduga  
Webesik Vieux Daniel
Krentduga Image:Compare.jpg Vuestena


Nyagaceem ke Scapin (Molière)

Bareaf nakileem

← 8-eafa nakila - 1-eafa nakila - 2-eafa nakila →

Ara ava se