NyagaceemScapin Nakileem02 Nakila07

Teliz mal Wikikrenteem.

Grablé kal exulera, aneyara

Nyagaceem ke Scapin


Toleaf nakileem, pereafa nakila

Scapin : Ey kelt ! ey meabdiwiyina volfikuntaca ! ey kimtafe gadikye ! Kimtafe Géronte, va tokcoba askitil ?

Géronte : Va tokcoba icde jin in kalir, ton bata vanmanana gexata ?

Scapin : Kas kontan pu jin rokalir lize Géronte jiomik tigir ?

Géronte : Tokcoba sokir, Scapin ?

Scapin : Tokliz va ine co-rokevlaní enide va bata volfala di kalí ?

Géronte : Tokcoba tir ?

Scapin : Kotliz giopon vulté ta kevlanira.

Géronte : Batse jin.

Scapin : Konlize me rodiepilé ape va int palser.

Géronte : Xolo ! Til wiiskaf larde va jin me wil ?

Scapin : Ax ! Weltik, kevlanira va rin tir wavdaca.

Géronte : Mali tanoy bartiv lente rin tigí. Tokcoba tir ?

Scapin : Weltik…

Géronte : Tokcoba ?

Scapin : Weltik, rinafe nazbeikye…

Géronte : Ex ! Jinafe nazbeikye…

Scapin : Ko divulapafa volfikuntaca al luber.

Géronte : Is ko toka ?

Scapin : Va ine gabentapafe rerielon al krupté, gu koncoba rinon kaliyina, ise liz va jin evartajon belcekayal ; nume, djudeaseson va bata gabentaca, kene molt al gozav. Batlize, vanmiae konakcoba, va paaslepeyena turkafa efruda al kodisukev. Sivanyaf jotaf turkik ganeyer enide di kolaniyiv aze va nuba al atoer. Al askiv ; al riewovgupur, va zergera al firvir nume va yon donarsaf ilt al estuv ise tel lokiewaf vor ke tamava al uliv.

Géronte : Toka vanmanara koe batcoba ?

Scapin : Kel, weltik, benfí. Edje estuyuv, va efruda van bira volmiv al jupar, aze, wison da ile molt tigitiv, va jin ko witka volmiv al rundar. Dure al stakser enide pu rin kalí da ede kan jin va alub- decemoy erbolkap fure me co-staksel, pune va rinafe nazbeikye ko Jazaira maljupatar.

Géronte : Tokon, fotce ! Va alub-decemoy erbolkap ?

Scapin : Gue, weltik ; ostik, ta batcoba va toloy bartiv pu jin anton al zilir.

Géronte : Ax webdaf turkik ! Batinde zo adjubé !

Scapin : Weltik, va mergil ta giwara gu busum va rinafe krenugapon renane nazbeikye wiluon goboyukel.

Géronte : Oyox, tokdume mo bata efruda in al lanir ?

Scapin : Va bata sokira me modovayar.

Géronte : Mallanil, Scapin, va turkik kevlanil aze kalil da va malyerot kev in fu staksé.

Scapin : Malyerot koe grocela ! Kas nulel ?

Géronte : Oyox, tokdume mo bata efruda in al lanir ?

Scapin : Ikorafi bali va olkik dile sojupar.

Géronte : Fiste, Scapin, ton sagaf zanisik gotegil.

Scapin : Va tokcoba, weltik ?

Géronte : Va bat turkik gokevlanil enide in va nazbeikye pu jin di dimstakser, ise kalida va eruna itaya flavatá, va int gu in di ikarundal.

Scapin : Ex ! Weltik, kas va rinaf kaliks en trakul ? Ise kas guzekal da bat turkik tir pestorapaf eke va man jastrik dum jin ika rinafe nazbeikye co-kazawar ?

Géronte : Oyox, tokdume mo bata efruda in al lanir ?

Scapin : Va bata volkalaca me guzekayar. Modoval, weltik, in va toloy bartiv pu jin anton al zilir.

Géronte : Kalil da erur…

Scapin : Va alub-decemoy erbolkap.

Géronte : Va alub-decemoy erbolkap ! Kas me jiligar ?

Scapin : En, turkik somejiligar.

Géronte : Kas grupel dacoba alub-decemoy erbolkap tid ?

Scapin : Gue, weltik, gruper da tid vas decit-alub-decemoy livre erbolk.

Géronte : Kas folir, zatkik, da decit-alub-decemoy livre erbolk lev bora ke okol zo rotrasid ?

Scapin : Man korik va ova somegildar.

Géronte : Oyox, tokdume mo bata efruda in al lanir ?

Scapin : Efe ; vexe tokcoba ? Ine va debala me abdiwiyir. Vay, weltik, ampul !

Géronte : Gil ! batse tselka ke jinafa rastoka.

Scapin : Ae.

Géronte : Fenkutul !

Scapin : Ae.

Géronte : Va tselkapa, va tela ke jinafe olkxe, talteon trasitil.

Scapin : En.

Géronte : Va flormeem tigis koe bat liozak naritil aze pu guzexonyik doletel, enide va jinafe nazbeikye di rodimlusté.

Scapin, ~ dimdeason va tselka ~: Ex ! Weltik, kas klokel ? Va decemoy franc talolk ika kotcoba kalina me seotatá ; ostik, va dik kserayan ugal grupel.

Géronte : Oyox, tokdume mo bata efruda in al lanir ?

Scapin : Ox ! Manote drasuna ewa ! Va bata efruda batliz iskel, ise modoval da ugal keyur, ise va nazbeikye di laxudrasul. Kax ! Mefalaf feliik, rotir va rin batvielu mea wití, ise rotir viele pulví, ko Jazaira wetce levetirik zo staksel. Vexe kelt vrutatar da mu rin va kotcoba rotaskina al askí ; ise ede me co-dimlustetel, pune va nucansa ke gadikye anton kagatal.

Géronte : Kel, Scapin, va bata itaya fu aneyá.

Scapin : Kle ampupul, weltik ! Skotcá da bartiv fu mamlar.

Géronte : Va balem-decemoy erbolkap kalil, mex ?

Scapin : Volgue : va alub-decemoy erbolkap.

Géronte : Va alub-decemoy erbolkap ?

Scapin : Gue.

Géronte : Oyox, tokdume mo bata efruda in al lanir ?

Scapin : Ovel, voxe ampul !

Géronte : Ara gozara me rotiyir ?

Scapin : Efe. Vexe wiluon tegil !

Géronte : Ax, rotapsana efruda !

Scapin : Ine va bata efruda kralir.

Géronte : Gil, Scapin, me setikeyé da va mana moavafa itaya xuye su kazawá, voxe me trakuyú da ina kaliapon co-solimpar. ( Va filav pu in atoer voxe me divgir ; ise mazekapar, dum Scapin djugralombes va filav. ) Gil ! Lanil aze va nazbeikye dimlustel !

Scapin : En, weltik.

Géronte : Vexe pu bat turkik kalil da in tir gomiliik.

Scapin : En.

Géronte : Krizik.

Scapin : Arse.

Géronte : Volfonkik, dubiesik.

Scapin : Iskel da di askí !

Géronte : Va alub-decemoy erbolkap gu jin nekev beta rokinda levimpar.

Scapin : Efe.

Géronte : Nope awalk ok bli me zilí.

Scapin : Tire.

Géronte : Ise ede va in xuye co-gralometé, pune va int en jaxadatá !

Scapin : Acke.

Géronte, ~ ko ucom va filav dimplekur aze mallanir ~: Lanil, kalion lanil ta nazbeikye !

Scapin, ~ kadimlanison ~: Xolo ! Weltik.

Géronte : Va tokcoba ?

Scapin : Toklize erba tigir ?

Géronte : Kas me al zilí ?

Scapin : Volgue. Ko rinaf ucom al dimplekul.

Géronte : Ax ! Kranav va swava skalter.

Scapin : Rabatecké.

Géronte : Oyox, tokdume mo bata efruda in al lanir ? Ax, rotapsana efruda ! Zatkaf turkik ke oretlik !

Scapin : Ine va alub-decemoy solimpan erbolkap me rologar ; neke zavzar bozakirafe gu jin nume ika ara itaya, va intafa bagera askiyina kev jin lente nazbeikye, fu gododer.

  Xanto  
Vergumvelt Les Fourberies de Scapin
Sutesik Jean-Baptiste Molière
Piskura -
Ava Francava
Evla 1671
  Kalkotavara  
Vergumvelt Nyagaceem ke Scapin
Kalkotavasik Staren Fetcey
Piskura -
Evla 2006-2013
Klita Kalkotavaks
  Krentduga  
Webesik Vieux Daniel
Krentduga Image:Compare.jpg Vuestena


Nyagaceem ke Scapin (Molière)

Toleaf nakileem

← 6-eafa nakila - 7-eafa nakila - 8-eafa nakila →

Ara ava se