Laspedaf vageiasikam

Teliz mal Wikikrenteem.

Grablé kal exulera, aneyara

Laspedaf vageiasikam

Reiz : Laspedaf vageiasikam

Darekeon. Idulugalon lanrielon, vageiasikam debanyes bene kobarak is aflicenyes, saipon asadar. Tawadayikya ko vawila artlanir, ier :

— Va godolena botedanya ! Va godolena botedanya !

Vageiasikam va batyona ewa puveon gilder. Va gedelafa taka rem dilk plekur aze kalir :

— Batliz kallanil, abegaf weltik ! Batlize va rin gu doleks fu grifuné.

Ayikya do gamiafa kita va baroy avlak tidlanil aze vageiasik askir da ina va furutseem bascekar. In va kot olkoy rinder, ko rid gir, espedar aze turkon dakter :

— Bata boteda nutinyir. Kle va unze lumacku aldoal, abegaf weltik. Kore anton amu tir, loxe.

Ayikya, djupotrasiyisa va anelanyik, va eruks zilir, voxe mibuyuna bulason mallanir.

— Dure, ~ vageiasikam kalir, ~ Lorik va bata sinka kumzilir ise po pu jin zo zilir !

Va begxa kou tinida narir, va kipi dadoon gaber aze gu boteda besar.

— Batcoba me titir rotafa, ~ in kalir. ~ Vexe abdida talgá, va bate vage gotenuké.

Va gabiyexa pokon aykar aze wan asadar nume, yoke daava, va lolokiewaf puileks askir. Batedje, dakela ke boteda va rebava ke mawa artstir lize jontika nefta tigid nume zo vanimpad aze va gabiyexa moebidud.

— Ex ! ~ vageiasik kalir. ~ Toktan va win al ganer ?

Nume va batyon medjumen emudenik aloyar. Vexe nefta, somegildas va ayava, me zo djufidwad. Loote gire arttalad. Bam, sedme karedjo, vageiasikam va uksala tidstisa va pez pestaler. Va bilunt ebidur ise va sin vordavapar. Viele va bilunt kaimpar aze va kosafa ota patar : va en peroya enatayana nefta. « En tí fananyik », mafelason va intafa laspeduca pu int kalir. « Kotafa widava gogruper ! »

Aze, ekeyuson, va anamba ilboder aze asadar aze ton yon eltayap va « Va peroy tanvordon » moon fider.

« Ex ! tokcoba, widava… kotrafa tamava va batcoba gogruper ! » Ise inafa takra dum ault ke namuloloc daavon gandir. Vageiasik anam alto va anamba vaniksantur aze egadar da den tamava di mallanir, trakuson da onya tir pinarsafa kev intafa takreluca. Abdida va mona bulur, va roburenaca anameon aneyar. Va bluda anton trasir voxe koucomar. Kabdue tuvel, va koberipaweyesi zveri katcalar ; do bluda plekur. Azon, laspedon mallanir ise larde tir bagaf is tuzaf, va meku cu pestaler. Kelda mo mevtava va in jupar aze urpeyeson va tele ontine, va gulik aulon disukes va patectoy wir. Vageiasikam laspedon vanlanir aze stiakar :

— Kiavá, palik ! Kle batlize debanyel ise va tamava mafelal ? Tire liz laní enide va dugeem gonexaksá. Kas co-dulapetel da do jin di pil ?

Gulik va vageiasik vliguson rinder aze kalir :

— Vligunik, korikaj !

— Batinde folil, ~ grigergason va lioza is nedison va anmba pu gulik, vageiasik kalir.

— Va man jin disukel !

Gulik belir : « Va peroy tanvordon ». Gestir da batcoba tir icde ayik atayan gan vageiasik nume va omik toz tarkamar. Vexe va in taneon djuposar. Ko nuba va rapor narir voxe poon licar eke lava divnir.

— Liinde askil, ~ kalir, ~ ede til pokiraf.

— Va anton batcoba ? ~ vageiasikam erur. ~ Rumeafa vefara !

Va nuba koucomar, va bluda divimpar aze poapon xuvar eke kratela divtraspur.

— Xeim, ~ kalir, ~ batcoba al tir lokiewafa !

Gulik va mecoba grukalir. Va omik me laxufolir. Va rapor narir aze ontinapon kabur eke riwe mea rowir.

— Kle, klodajik, liinde askil !

— Ilkaburanya, ~ vageiasik kalir ; ~ vexe rapor mo sid al kaluber. Va koncoba medimtalatasa fu kabú.

Va zveri divucomar aze tid rid kabur. Kalafi gu nuyuca, zveri va kelt tidtalar aze me dimtalar.

— Va tokcoba icdeon kalil, palik ? ~ vageiasik kalir.

— Grukabul, ~ gulik kalir, ~ vexe fure wit kase rodevajackal.

Pok lubenafa persapa va vageiasikam jupar aze kalir :

— Ede co-til pockaf, pomal enide va bat aal div aalxo di divplekut.

— Finenyé, ~ ayikam dulzer, ~ mo epita va ulim naril ; va gameem bureté, batcoba loon olgafa.

Gulik mo epita va ulim narir ; vageiasik mo gama debanyar nume gulik, me rorwodes, va varaf aal is ostik vageiasik goburer. Bantan tir daavapaf ise aflicenyer. Azdason dankar : «  Baroy vageiasik dive widava okollapiyid… » dumede burera va bat aal co-tir rumeafa vefara. Radimi burerapa gulik tabir nume divier :

— Terektal ! golubesí.

Vageiaisik tit gama kalion grabler aze pu gulik kalir :

— Til ontinapaf voxe va aal dace me rodeburel !

Sin belcon wan lanid. Solve va raneta vamoolanid, gulik va aalontine ebidur lizu lolukraf ilt rumkawed, ko nuba ke vageiasik plekur aze ganer da in di estur. Vageiasik tiyir axarsaf gu rodekagira nume viele gulik ilnarir pune aal dimatcewer nume ayikam tidon zo divtunser. Moida mo sid al kaluber, kidiskon, gulik kalir :

— Va tokcoba batcoba sugdalar ? Dace va bata peyama me rodekagil ?

— Va po somegrací, ~ vageiasik dulzer. ~ Gestil da batcoba, va jin tanvordon atayas va peroy, co-vudesir ? Vamo aal al grablé kire koe aala zeltas tcabanesik tigid. Grablel, dere rin, ede rodegrablel !

Gulik lagrabler, me laxugrabler nume koe gameem rumkanyer. Batdume, gire, vageiasik war. Gulik kalir :

— Ede jontikeke til laspedaf, ko cinafa betsa pil aze va mielcek doon tiskil. Vageiasikam naler nume dositar.

Viele sin ko betsa artlanid, ar gulik aname tey debanyed ise kot va granaf solzaks koe nuba gir ise bugdar. Vageiasikam anamdisuker ise trakur : « Bato xo tir gijafo lopon dam jinafa onya. » Gulik va ilava bazer aze kalir da in di senyar ise di keniber. Vexe ilava tir gijarsafa tori vageiasik. In me senyar voxe koe alava apcar. Ba miamiel gulik trakur da vageiasik kenibecker. Va azilobla narir aze, tanvordon, va ilava empar, su fojiadas va bat siddrumfisik. Ba gazda, gulik ko aalxo mallanid. Va vageiasik al vulkursud. Batse in daavapaf is rulokaf abdulanir ! Gulik ve vuded, kivad da di zo atad nume ampuson otced. Vageiasikam kare xuyava wan koyar. Arti koyarapa, ko kusk ke gazafa berma artlanir aze golde cuera senyar aze komoder. Edje batlize tigir, konaktan vanlanid aze moe anamba va « Va peroy tanvordon » belid.

— Ex ! ~ kalid, ~ tokenide bat gejapik ko minafi dili pir ? Arse tir gijarotif jiomik !

Va gazik kevlanid aze kalid, trakuson da ede geja co-vinustatar pune co-titir favlik is zolonik, nume da metode gonisked da in di dimlanir. Bata pirda va gazik puver nume in va tan intaf aboyik van vageiasik stakser enide in va sayaki fli ba divmodera di mbi firvir. Staksakirik poke kenibesik zavzagir, ker da in va kona bewa di kalizir ise di itafenkur. Aze va vuida atoer.

— Ta batcoba tire batliz al laní, ~ in dulzer. ~ Va gazik djuprokozaní.

Ton kota poraca zo kazawar ise va pilkafa vreda mbi koderaykar. Gejik va vageiasik soe volkrafiad. Galped da in arte decitoy lieue lum co-tigir.

— Tokinde batcoba sokitir ede co-kornat nume in co-dendar ? ~ va sint kalid. ~ Kotviele peroy lubeted. Metel ke min moblitir.

Sin kle gorad da va gazik belcon di kevlanid ise va inafa zanira di bulud.

— Cinafi bali me tir zavzagira poke ayik tanvordon balies va peroy, ~ kalid.

Gazik tir gabentaf da golde tanoy va intyon lokiewaf zanisik drasur. Co-djumer da mekon al wir nume co-kuranir da in di dimlanir. Vexe me rovevragar kire in va in is kotaf aboyikeem co-rotatar aze mo uskej co-ikarundar. Klabupur. Tere, rietar. Pu vageiasikam volmiv kalir da va koncoba djudrager larde in tir gejapik. Koe aalxo ke gazaxo toloy gulik irubad, kerestias is ellakes is atas is kovilas. Metan mewupeson rovanlanir. Ede in va sin co-ceneter ise co-atatar, pune va tanafa nazbeikya wetce kurera is lik ke gazaxo wetce buelera co-zilitir. Decemoy okolik co-vandositad ise co-kopomad. « Mancoba va ayik dum jin katir », vageiasik modovar. « Listafa sersikya is lik ke gazaxo, mancoba kotviele somesokir ».

— En ! ~ inafa dulzera tir. ~ Va toloy gulik kevceneté ise va decemoy okolik me olegá. Kontan tanvordon atas va peroy somekivar viele toloy anton tigid.

Vageiasik mo kelda mallanir ise decemoy okolik radimelakid. Artlanison run aalxo, pu dositikeem kalir :

— Batlize zavzagic, va gulik ant kevceneté.

Ludevon ic aalxo kolanir, anamdisukeson. Lanvulon, va toloy gulik kozwir. Sin vamoo aal senyed ise kenibed iptokapason eke gama yokeon zekad. Mevungaf, vageiasikam va kot ucom gu ye tukotrar aze ben aal tidumar. Ackuon ic ontine, ken gama kildegar liz en vamoe toloy kenibesik tigir aze mo ast ke kontol va rapor azu ar lubesir. Jontikedje gulik mekon pestaler. Tere divmoder, botceson va dositik, aze kalir :

— Tokdume va jin tazel ?

— Klokel, ~ artol dulzer. ~ Va rin me dendá.

Sin gire kenibed. Bam vageiasik va ye mo ban gulik.

— Tokcoba sokir ? ~ in ier. ~ Tokdume va jin tazel ?

— Va rin me dendá, ~ battan bulason dulzer.

Sin va sint abicedje motcad vexe larde cued, pune tenuwed aze gire komoded. Vageiasik va intafa vefara gire askir, va raporap narar aze mo ast ke bat gulik poon kabur.

— Slikon ! ~ battan divier.

Dum oviskik welver aze va dositik kev aal mimar, popon eke aal zo widlar. Bantan va arak ke talolk pu in katacer nume ve vudeped eke va konak aal divzaetawad ise va sint batkane dendayad. Tere, mo sid awalkeson belcon lubed. Vageiasikam va sid bam dimtitlanir. « Anye va aal lize waneyé al me divzaetawad. Mo ar dum werpol co-gogrableyé. Anye tí tuzaf, dum milindik ! » Va dug impar aze va kot ko ast konakote dugar aze va okolikeem kazokever aze kalir :

— Kobara tir skuyuna, va atas vord pu kottol al askuté. Al tir mefakafa. Ta rojura, va aal divzaetawayad. Vexe batcoba, kev kontan dum jin tanvordon rotatas va peroy, somezanudar.

— Me al zo bakayal ? ~ okolik erud.

— Va mek usukolk dace al grikendad, ~ vageiasik dulzer. ~ Okolik va inafa pulva me djufolid nume va aalxo kolakid. Va toloy gulik miles koe sinaf fortey trasid ise, anameon, konak divzaetawayan aal tigid.

Vageiasik va kuba abdiplekuyuna gan gazik malimaxur. Vexe bantan krular ise aneyar kane va int gu gradilik co-rogrifuner.

— Abdida va jinafa nazbeikya is lik ke gazaxo seotal, ~kalir, ~ ware gosegal. Koe aalxo voyapas noldokol tigir. Gogralomel !

— Va noldokol leon dam toloy gulik kivá. Va peroy tanvordon, batse jinaf nyapay, ~ vageiasikam dulzer.

Va wazdel is kufta narir, ko aalxo mallanir ise pu sayakikeem rundayan lev int gire kobenplekur da kene dom di gozavzagid. Abicedje ker. Noldokol fure artlanir, van in iper dumede vere djumorilnar.

— Aulon ! aulapon ! ~ in kalir. ~ Ugal loon gotitir.

Ker da sulem pokapon fu tigir. Bam, in kadim aal levgon welver. Noldokol va aal kevvulterser aze va nolda ko ulim vanludevar eke mea rokaimpar. Zo soper !

— Va bati zverimi gí, ~vageiasik kalir.

Kaku aal divlanir, va wazdel anam berga ke noldokol plekur, va nolda kuftason grifuner aze, viele kotcoba tir skuyuna, va sulem pu gazik jupar. Gazik va abdiplekuyuna kuba me djudoder nume bareon kredar. Abdi kurera, vageiasik va wafibol anamempas koe aalxo di gogralomer. Tcabanesik va in di pomad.

— Balte ! ~ vageiasik kalir, ~ batcoba tir rumefa vefara.

Va tcabanesik me dostar nume sin tid valeapaf kire gan wafibol jontikviele al zo ralentad milinde vol djulureskad. Viele wafibol va vageiasik wir, ton wilme bene kutc is dratces talgaveem vanon vulter. Mo sid djumimar. Vexe tuzaf gradilik ko pokefa amuda welver aze rem dilk kreme grableson divlanir. Wafibol al radimvulter. Vageiasik kadim in dimvulter aze va tuvel platir. Yatkaf govitol tir kobudenaf.

Rem dilk somegrabler, batcoba sotir wavdarsafa is medelvejarsafa. Vageiasikam va yon tcabanesik rozar. Sin va kobudenik miv wid. Gradilik va gazik soe denlanir nume in va abdiplekuks goskur, eron voleron ! Va intafa nazbeikya is lik ke gazaxo dozilir. Co-grupeyer da vageiasik vols gejapik lenteon tigir, pune arienta moe inafa takra ware loon co-zavzatar. Kle vidia sizuntapon vox medaavon dilizer nume vageiasik vanpir gazik. Vanion, jotafa gazikya va kurenik klokes lansielon gilder.

— Fanik, ~ in kalir, ~ va vage tori jin ial ise va jinafa rija dimkiewal, edeme va lumpeya mo rinaf oblakeem ariseté !

Ina bam gildar koe toka nudinda jotaf gazik al koblir, nume ba gazda va intafa niga pu gadikye kalir ise erur da ine kev bat ayik di nendar, kev tel anton tis vageiasik. Gazik va ina vinur aze kalir :

— Diremielon, va rinafa mawa gufenkunal. Viele in kenibeter, jinaf zanisik diveon tigis kolanitid aze va in gluyedatad aze mo tota bureted aze in ko glupafa tamava zo iljupatar.

Batcoba va nazbeik puver. Vexe gazapomasik, koton gildeyes is abidas va jotaf jiomik, va in kevlanir aze va varafa arienta pwader.

— Va werd lev intaf nugeem fu gabé, ~ vageiasikam kalir.

Resielon, ba giltaf bartiv do kurenikya senyar. Viele ina folir da in keniber, pune ina ranyar aze va tuvel fenkur aze dimon senyar. Vageiasikam, nujikenibes, popon toz ier :

— Fanik, va vage tori jin ial ise va jinafa rija dimkiewal, edeme va lumpeya mo rinaf oblakeem ariseté ! Va peroy tanvordon al balié, va toloy gulik al atá, va noldokol al gralomé ise va wafibol al kobudé voxe va yon korik diveon tigis lente mawa co-gokivá ?

Gildeson va bata pulvira, battan ve vudeped. Otced dumede gan oretlik zo co-onkad. Nume kontan va int guon mea di djuralentar.

Rekeon. Batinde arti blira vageiasikam di zavzayar gazik.

  Xanto  
Vergumvelt Das tapfere Schneiderlein
Reizak Kinder- und Hausmärchen
Sutesik Jakob Grimm isu Wilhelm
Piskura -
Ava Germanava
Evla 1812
  Kalkotavara  
Vergumvelt Laspedaf vageiasikam
Kalkotavasik Elisabeth Rovall
Piskura
Evla 2013
Klita
  Krentduga  
Webesik Seramikya
Krentduga Image:75%.jpg Gotuenana

Yunkeks ke Carl Offterdinger
Yunkeks ke Carl Offterdinger