Koltolk

Teliz mal Wikikrenteem.

Grablé kal exulera, aneyara

Koltolk
Xayastanaf reiz (Xayastana)


Konviele tiyir koe wida ayik fenkuyus va sinkadolexeme. Intaf arienteem guyundenheyer kire antafe dolexe koe wida tiyir.

Gazdon konviele tuvel ke dolexe ve fenkuweyer. Namulolsusik ke vegungafa wida do intaf vakol tiyir. Koe nuba va peyapa giyir.

− Va nik kiavá, anton va abic kolt co-djumé.

Namulolsusik va furutsama ve atceyer. Kan bata nuba va in ve nariyir ise kan bana va tiawa ko milunt dem kolt ve plekuyur. Tit tiawa koltolk ve lubeyer aze boreon mwarnesa nefta va bata belaxa titon ve ipeyer…

Karvol ke dolekik anton mialon kenibes mo nefta ve welveyer… nume ko kolt va nefta tanon inhason ve seluyur.

Karvol va kotcoba wiyis, wetce gronaf volnik ke karvol, toz buuyur. Karvol ve kotcasotceyer, vakol ve abdulaniyir aze mo karvol ke dan va tolla ve kalmucuyur va int ve mimayar. Wison va xonukananhaf karvol, dolekik ve divieyer :

− Ficapik ! aze zidon tuwiiskan, va vakol ve ipeyer aze tiawaliepeson ve sagondeyer.

Riyomepes is nigepes namulolsusik ve evieyer :

− Govotik, va jinaf antaf nik, va jinaf begwasik su stakel. Rin is rinikeem zo rotapstac !

Nume in ben larida va dolekik ve vannariyir solve da bantan ieyer :

− Grelec, zo adjubé !

Vexe gaverson tiyir. Namulolsusik va in su telomtayar !

Aldo ke dolekik ve fandizaweyer, mo telo ke vakol fandizaweyes moe telo ke karvol preyutas va nefta wizuyuna koe kolt.

Gildeson va iera, ko dolexe widik ve ipeyed :

− Kinokapafa, koe intafe dolexe korik zo atar !

Sin va namulolsusik ve vangiyid aze vordavapayad maneke in di awalkeyer. Warzot va awalkera ke namulolsusik va vegungafa wida di artayar.

Irubasik ervokiraf gu rapor ik leakom ik tresiki ik suxasiki va dolzukera egayad. Ba titmielara ko yona mona ke wida ke dolekik ve kolaniyid aze alieson is torson ve kalanteyayad.

Bantan milinde dimon di askiyid. Ke toloya wida is irubasikeem awalkoda is guboy is erolaks anton zavzad.

Varafo gazaxo va int tixayar, mu bati ki oku bani. Bam koe varafa patecta geja tiyir, eaftafa is atapasa geja.

Jontik is jontik is ware jontik awalkik tiyid. Ware batvielon, galovaf remblisik erud tokinde is tokdume batcoba al tozuwer…

  Xanto  
Vergumvelt La goutte de miel
Sutesik -
Piskura -
Ava Xayastanava
Evla -
  Kalkotavara  
Vergumvelt Koltolk
Kalkotavasik Sabrina Benkelloun
Piskura -
Evla 2008
  Krentduga  
Webesik Sab
Krentduga Image:75%.jpg Gotuenana