Kera mevtava

Teliz mal Wikikrenteem.

Grablé kal exulera, aneyara

Kera mevtava
Vietnamafa vunda


Lekeon, koe wida ke tidegola, toloy gadikiskik bliyid, battan tolsandafe oyikye is bantan inafa nemon perdafa berikya. Larde tiyid antaf koe tamava, mu sint tiyid kotcoba. Konviele, remlanis baliopik pu oyikye balirupeson kalir :

« Ede me roklá, golde winaf viel ke koblira isu bartiv, rin va berikya balion kuretel. Mecoba va winaf balisalt rodanteter ».

Olhasten gan bata eaftafa abdikalira, kotviele in ve gorayar da va berikya atar, drageson da ko aalxo ta intagabera malstar. Impavantason va meobrara ke berikya, kuftason ve balieyer aze ve otceyer. Di gorayar da yoltbetar ise ko Lang Son va int exoner. Jontika tanda di tiyid. Aze va nasbeikya ke kazik ve kureyer. Battan va nasbeikye di ziliyir ise va in tukalayar.

Konviele gazdon, koe koef kusk in va kurenikya turodasa va abrotcaf ebeltaf usukeem is debanhesa leve awaltap ve trasiyir. Ba da mo usukeem levmadason kan ara nuba in loiteyer, in va abrotcafa omza vamoe kapray ve kosmayar. Ziwiden, va lazava ve eruyur. Klabuson az boreson va intafa izva toz pwadeyer.

« Anton tí vanikatcuyuna nasbeikya ke kazik. Gadikiskaf jin do berikye bliyí. Weti san-alubda, megrupenon kondume, in va jin kuftason ve bakayar aze koe aalxo jovleyer. Gan yon drendik ve zo giwayá, dan va jin pu kazik va nasbeikya drasuyus is va jinafa debala saas di doleyed. Jin me grupé inde berikye di vanpiyir ise pebura va inafa volpeztoraca wan tir voldrikafa gu jin. Neke va sint renapayav. »

Kurenikye va kontega ve felileyer aze va yoni cenkasiki icde yolt ke gadikye is berikye is vowida eruyur. Sidjeson vox va mayakafa birga videson, ve tiyir kinokaf ise gan int ve zo tuaklayar. Di sugayar da va kurenikya is nasbeik ilar, impavantason va tixara kexina ta koervoliara is pokoleson da moe meldxo va tunuyara co-trasir.

Mali mallanira, va ageltuca megrupeson, keafa is trobindasa kurenikya keyer. Kotsielon, va nasbeik manariyir aze mo mevtava tidumayar enide va dimpira ke kurenik pitcar. Mali jontika tanda milinde askiyir. Konviele, va mevtava tidlaniyison, puskenafa is ranhesa ton zidatitickas iteem, ve turaporaweyer, yalstafa koe intafa parmafa kera.

  Xanto  
Vergumvelt Hòn Vọng Phu
Sutesik -
Piskura -
Ava Vietnamava
Evla -
  Kalkotavara  
Vergumvelt Kera mevtava
Kalkotavasik Jacques Nguyen Tanh
Piskura -
Evla 2008
  Krentduga  
Webesik Nguyen Tanh
Krentduga Image:50%.jpg Gotuwadana