KanakafaVunda Pu nikeem ke Europa

Teliz mal Wikikrenteem.

Grablé kal exulera, aneyara

Pu nikeem ke Europa


I : Pu nikeem ke Europa

Banlize bak 19-eafa decemda tigic ; batlize ugalon gu raporkufta tigiv ise va alaakaca vas suterot digiv.

Me alaakafa danka ke Klaamialuk, voxe tela ke taneakapaf ugal ; dem ravlemeemam is rumekoraf grabom.

Nega dere me tid vunda ke Klaamialuk, voxe gu pulva konakviele rotugana ton leca rotir vektad.

Bro reiz ke gestusikya, kanakafa vunda sotid teniskafa ; onton tid bata vey bana, onton vuriskon radimifid, konakviele dere reizusik va gubef radimifiks trovgavur, medasason va nega.

Batcoba tir ovopapafa kire Faltalukastkirikye (La Barbe Bleue) lodam Astolalmakirikya (Peau-d’Âne) medume abdion zo goplekur.

Bata nega isu dank tid tel kovdas va kotaf ayikeem ba taneafa klaa ; batdume trakura ke kanakik jontikviele drikon zo rogildar ise blayak zo rotukotrar. Inaf martig kotraf gu ikasugdala ostik tir blif ; zo wir lidame zo terektar, larde ware tir ugackaf.

Kipi ke ravlemeem ke bata neva tir ke grupaf kanakik, Daumi, dan va konaka cosafa orpa dile ebokon undeyer, va tulon tela va ayatoruca. Sedme in, batcoba daner da awalkik sir da zo estur oke me zo estur, ise da ostik batcoba va aelesik zanar :

— Vexe, ~ Daumi loplekuyur, ~ bata orpa va cin malipon turelkar ; ise mali ugal ke veygadikeem, me folí da jinaf grelt al grivuter, ok dace cugar grelt rade abica jaxadara.

Min, trakut da ayatoruca dere timir klarmafa griva nobafa gu taneakapik ; in abicon wan tir zugiaf govitol.

Kanakafa zaava tir kiewafa loon dam jontiktan folid ; sin va vonafa rieta pestaled kalion loon dam rogildat ; ina va zijnucarsa ko sinaf iteem plekur solve nega va lyumara va koafima vanteyar.

Daumi kanakik va jin porayar atoeson va berikye govitafe lopon dam in vox djuradase va minaf baalpes vwepaf seltay, is baroy ok balemoy nik ~ tan pof dum Herakles is dem ayikyafa divatcetaka dem loitesiki koe kalkumavayan usuk gotir tula ke anlizukik ke sare ke Cook : zijnucarsa bene gexata, vox wexayes varenkeem is cuynaf talgeem, vwepafo jo is pof prijusteem, yinaxada ke snavol, gevana is odiakafa ita ; aotceks ke jaftol is krapol is rumeik.

Bata zaava kevvoneweter oke griawitir ? Kas kanakaf siday tir kova ok ilava ke ilblira ke poiskafa zaava ? Va taneafa levaykara rade konaka saneta trakú. Kle belcekason gu guazafa zaava ke Europa videra va batyona saneta co-rotir ; bata va intafa gruuca is banyona va sinafo po pu jotafa oxila co-zilid.

Keson, solve winaf batakaf trakopik va eluxa tuebeltad, va yon ebeltaf ezlik anamterektá ; vexe bat ezlik va minyona nartafa ewa gildajana gu intyona taneakafa ewa aje belcekad. Kas ravlemeem ke saneta me tir intaf lideem isu izva isu altoza ?

Zaava fu griawir voxe va vugcoba grupet, ise englavafe is kanakafe is francavafe sowe isker da vug ravlemack remblir.

Kas bata afoka me co-rokonarid, bata zaava co-rovayar, abdida izga va yona izvon rilitafa xa besar ?

Ede vayara va awalkoda ke cos tir favlafa, toklize do kanakafa zaava blieson co-rokobat ? Kas abica izvafa bliera berde me tir ?

Tokote bilolk me al zo isked da ko bup lubed ? Batdume in tir maneke aludevaf.

  Xanto  
Vergumvelt Aux amis d'Europe
Vundak Légendes et chansons de gestes canaques
Sutesik Louise Michel
Piskura Les Petites Affiches de Nouvelle-Calédonie
Ava Francava
Evla 1875
  Kalkotavara  
Vergumvelt Yona kanakafa vunda isu alaakaca
Pu nikeem ke Europa
Kalkotavasik Bruno Cordelier
Piskura Kotava.org
Evla 2007 (tolbuneks : 2013)
Klita Kalkotavaks
  Krentduga  
Webesik Bcordelier
Krentduga Image:Compare.jpg Tuenayana


Kanakafa vunda (Louise Michel)

← -- - I : Pu nikeem ke Europa - II : Ilava ke gadikeem →