KanakafaVunda Mielnega

Teliz mal Wikikrenteem.

Grablé kal exulera, aneyara

Mielnega


XIV : Mielnega

Mielar ; grelt, senyes valeve wageya, bak taelara, isker da gan puda ke djiga is yona nega ke reizusik zo kovdar, ke reizusik kenibemes ik krodoemes kalis va yona tacukafa rupa dum klok.

Konaktan kalterektad ; artan bro in, modamas, va onton reizusik ok onton intafa gesta malterektad.

Koe aalxo rozara ke notu sulem gabenton mamar ; va nola ke jaftolsusik vektar ; zokaf swavik ke kiray, vreparlen gan tael, vanpid tacedik dem gem kum kerafa tawa ok kalkafa koxawa.

Sukera ke xefto koe gael egawer.

Dile, mo grelt jivotsenyes, vesnol leve wilteem va gael tufedar.

Sumeon, sumepon, kima va batakik tigir : abdigadaf taway, ketaf gu bora ke diveik.

Wida tir kulafa ; brava tori guema is sfixo is nodxo tigid ; kotvielon warolaks ok onaks zo estud. Va tokcoba loon rogalpet ?

Batdume reizusik tir gabentaf ise va yona grenyafa rupa pwader.

— Gelkeon, ~ kalir, ~ ugale taneafa batakikafa guema al artlapid, grelt tiyir kulaf is gijarotif dum winaf ; lansielon, do nazbeikeem, ken bira wiveyer.

» Yikye toz azdayad, dison va itupafa takra ; yikya kipeyed.

» Grelt va jontiktan dadiyir eke va domega ton ematcap kereleyer.

» Guazik va kolnara va warzafa wida pu sint pulviyid.

» Levgon, meftava atitsuyur nume va grelt besayar.

» Batdume batvielu, pokelanison va meftava ke jontik grelt metan sokazdar.

» Vexe folic, me tir azdara vanimpasa va pistok vols kaluca.

» Jin pwadé, konakviele al wí.

» Taneatomon, tiyí velik : pesteyé kalapaf eke vugedje kenibeyé enide wan pesté blis.

» Vexe toktan vanmiae gama banlize kaliziwer ? Ede co-tir suka, pune ontinuk zo co-tegular.

» Me sonkeyé da gadikya kobarsayar : tre burera va vajap, vanpiyir xowapasa, nume lanvielon, lubeyeson golde aldo ke vanburen kabay, senyayar aze awalkeyer.

» Gadikye va ar yerumanik nariyir : in va jin alieyer ; vexe vanpiyis sardik, va sinka miv aneyayá nume in va koncoba mea kaliyir ; azon, savsafa yerumanikya ke okilapik, greltgrelton koyasa, kaliyison da tiyí listaf, pune va arcoba mea trakuyú ise batcoba tukalayar.

» Lanmielon modovayá, bam wageye mo gexata ve lubeyer nume va jinaf pez seluyur : batvielu tí evakaf.

» Aguntanik va jin me ve djumeyer ; wori, co-tukalapayá : kotviele cin ant co-tigiyiv, pune va vaj ikaon co-bureyé, dimplekuckuson mo inafe ge kabduo widik ; in do jin co-estuyur, meviele co-alieyé, voxe me al djumer ; al isker da den kiray ke Weami-dyakul (ubiga) al zo vanstar ; ise va kot rapor ke inafa poxa ik kotaf tcabaneks iku onaks gonobureyer.

» Kle va Eluey (kusafa gefesta) kevlanil dume toa tegulawed !

» Vexe Eluey me kevlaniyir. Va dik ugal dadiyir : batcoba tiyir akoyera ke greltap ke ara ewala aneyas va inkexo.

Reizusik oveyer : me tir azdara atitsusisa va meftava vols kaluca.

  Xanto  
Vergumvelt Récits nocturnes
Vundak Légendes et chansons de gestes canaques
Sutesik Louise Michel
Piskura Les Petites Affiches de Nouvelle-Calédonie
Ava Francava
Evla 1875
  Kalkotavara  
Vergumvelt Yona kanakafa vunda isu alaakaca
Mielnega
Kalkotavasik Bruno Cordelier
Piskura Kotava.org
Evla 2007 (tolbuneks : 2013)
Klita Kalkotavaks
  Krentduga  
Webesik Bcordelier
Krentduga Image:Compare.jpg Tuenayana


Kanakafa vunda (Louise Michel)

← XIII : Gejadanka - XIV : Mielnega - -- →