KanakafaVunda Idara katcilikya

Teliz mal Wikikrenteem.

Grablé kal exulera, aneyara

Idara katcilikya


VII : Idara katcilikya

Idara katcilikya valeve wageya debanyeyer.

Anameon yikya stasa va sielstutera tigid.

Kabdueon yikye edgardavalud viele ina stivawer ise enide tildewer ise zo permur.

Pokeon guazik is gejik tigid ; titeon rumeik is ayikya.

Idara tir nazbeikya ke grelteem, va paokik do budik al kevalier.

Idara tir gadikya ke yon gradilik ; va sinaf bakaks kan roxanana toa ke taelaftason yestana gefesta gasuper. Va tuidulasa buis uliwa zilir ; va sin kan dioladank dere kokeniber.

Terektac guazikye, Idara fu pulvir !

Va art dem skotcas talgeem dem griopayan uul fenkur. Viele batakik kan yona guemapa al artlapid, va sin al rotapsav kire kan gleba dilfuyud voxe va tceka is zminta is raporkufta anton digiyiv.

Va intyon fay ko greltafa tawa al faytawed ; va yona raporwida den krant al kolnad lize poke voa is wageyaxo mu telyona cinafa kiblayad : valeve pist bravatas va guema.

Batakik va krant dem jontika bilka isu sfi is va mefta besayana gu nod al wid ; va kot tilit plek ke kiray al wid ise vliguson al disuked.

Batakik kene bostap al gozad ise va cinaf midureem al saad ! Vexe win va gor ta tawafenkura digic ! voxe cin va peya is tey is kufta anton digiv !

Ede win gu antaf tuwavaf rob zo levkimac ; kas lodote dam cin co-tic ?

Ise beta tid winafa kulaca, va cin gu koncoba godjumac, larde mal bana domega ke uzdapa kal greltxo lapic.

Va win al kevaliev ise al rotapsav, va win artlapis is koilkas va cinafo vo.

Va win wan kevalietev ise wan rotapsatav. Vexe toktan va win star ? Ise toka sukara va winyona guema al platir ?

Kas kot grelt ke tamava remo kota bira kotviele kotlizu kereled ?

Sukec, ey yik, ko edgardaval ! Idara al pulvir !

Guazik, govoreizuc, grelt kalterektar !


  Xanto  
Vergumvelt Idara, la prophétesse
Vundak Légendes et chansons de gestes canaques
Sutesik Louise Michel
Piskura Les Petites Affiches de Nouvelle-Calédonie
Ava Francava
Evla 1875
  Kalkotavara  
Vergumvelt Yona kanakafa vunda isu alaakaca
Idara katcilikya
Kalkotavasik Bruno Cordelier
Piskura Kotava.org
Evla 2007 (tolbuneks : 2013)
Klita Kalkotavaks
  Krentduga  
Webesik Bcordelier
Krentduga Image:Compare.jpg Tuenayana


Kanakafa vunda (Louise Michel)

← VI : Batakik - VII : Idara katcilikya - VIII : Yikyeem ke Owie →