John Steinbeck

Teliz mal Wikikrenteem.

Grablé kal exulera, aneyara
John Steinbeck

1902-1968
Englavaf amerikaf suterotik

 Nobel Suterotafo Poradro : 1962

John Steinbeck bak 1902 koblir koe Salinas ke California koe germaneirefa yasa. Gadikya, bematavesik, mali klaama va griva ta belira dear. Vanmiae gelukaf neveem, tulon tid Gomilara is tigara ke Dostoyevski is Drasuyuna fuda ke Milton is Awalkera ke Arthur ke Thomas Malory.

Vani vayara koe golafa reila, John Steinbeck va vayara va birafa bliopa koe Stanford kotla bokar, bak tevda, vox meviele bodas va rindera. Ae krupteyer da va batcoba me olegayar kire guzekayar da di vanpiyir suterotik ; ostik, konak inaf suteks koe kotlafa virda ixam al awiyid.

Wetce felusik dene The American radimion kobamayar aze ko California dimlapiyir, abdualbason va konaka exavama rovodektusa va sutera.

Cup of Gold (Bilaga dem moava) bak 1929 tir taneaf berpotany, voxe in aje me kiewatcayar eke Steinbeck etudeyer. Azon di tiyid The Sea of Cortez (Cortez Bira) az To a God Unknown (Pu megrupen lorik). Bat baroy berpot bevulamayad meawin nume anton tir ba sanegara va Tortilla Flat da Steinbeck gu kiewatcaf suterotik toz zo kagrupeyer. Bata neva, konakilasa va amerikamexikafa doda djukapojasa va blira, is brapon suteyena, vodayar da in gu fitc di zo karolayar.

Steinbeck wan suteyer, tulaeason va yona lyumara koe California isu yastera, is yordason va felus suterotik. Ostik dene New York Herald Tribune bak Toleafa Tamavageja is Vietnam Geja kobayar.

Inaf lospoasaf berpot va konaka watsa rued : batinde Amerika is Amerikeem va Amerika wetce patecta dem klaba deltar. Valev Zideracenta, dere tid Widiovu vawila is Yon slakol isu ayik is Talte Eden. Ta sutera va Zideracenta, Steinbeck exuleson va koto kolamasikafo pemaxo koe California bak 1936 anameruyur. Bata neva fure tukategisayar ise gan pulodik dace zo vajikeyer. Tele gevase ke bata neva tir da, koe elpataf siatos malskuyun gan John Ford, pizafa tena suteyena gan Steinbeck me zo kagiyir voxe gan kiewatrakusa tena lazavana gan rewara va New Deal talpey ke Roosevelt zo ikarundayar.

Icde ilkafa blira ke Steinbeck, toloya taneafa kurera ten rodjeyed vexe soe barkureyer. Nazbeikye mali perda golde rofavera va codeina dorora zo koropexeyer, aze kotabliron va yon atatas zvak va ruyat is mala di lyumayar. Koe mivizva (The Other Side of Eden) va blira ke nazbeik ke yambik pimtar.

John Steinbeck koe itara ke FBI dere tiyir beka kotviele zo meuyur. Taneon Zideracenta berpot koe doevaf feleem kuvapon zo emudeyer, vexe ostik in va The Daliy Worker vieleafa doevafa fela tiackon beliyir. Ise dere kurenikya wetce vilkiraf doevik zo krafiayar. Milinde, Steinbeck wetce tubizik zo krafiayar kire ko TSSS al koyayar. Vexe bata koyara tiyir enide va mukodafa disukera icde doeva ta Rossiafe pone neva (1948) di co-rovanbureyer.

Steinbeck bak santoleaksat ke 1968 takradeoneson mulufteyer. Ironokafa neva, Tegira ke Arthur gazik is yon olukaf okoldik, sanegatan kaiki awalkera bak 1976, tiyir icde yona vunda va Arthur is inafa poramwa ; Steinbeck kle al gorayar da il yona watsa va noelot is gaderopa kereleyesa va lok ke grabom va int danteyer.

Bak 1962 John Steinbeck va Nobel Suterotafo Poradro al kazawar.


John Steinbeck

John Steinbeck
 Blira 1902-1968
 Ava Englava
 Suterind Berpot
  Suterot

  • Cup of Gold (1929)
  • The Pastures of Heaven (1932)
  • The Red Pony (1933)
  • To a God Unknown (1933)
  • Tortilla Flat (1935)
  • The Harvest Gypsies (1936)
  • In Dubious Battle (1936)
  • Of Mice and Men (1937)
  • The Long Valley (1938)
  • The Grapes of Wrath (1939) – Zideracenta
  • Forgotten Village (1941)
  • The Log from the Sea of Cortez (1941)
  • The Moon Is Down (1942)
  • Bombs Away: The Story of a Bomber Team (1942)
  • Cannery Row (1945)
  • The Pearl (1947)
  • The Wayward Bus (1947)
  • A Russian Journal (1948)
  • Burning Bright (1950)
  • East of Eden (1952)
  • Sweet Thursday (1954)
  • The Short Reign of Pippin IV (1957)
  • Once There Was A War (1958)
  • The Winter of Our Discontent (1961)
  • Travels With Charley (1962)
  • America and Americans (1966)
  • Zapata (1975)
  • The Acts of King Arthur and His Noble Knights (1976)