Jean de La Fontaine

Teliz mal Wikikrenteem.

Grablé kal exulera, aneyara
Jean de La Fontaine
1621-1695
Francavaf suterotik


Kudeem, reduyun mal tel ke Esopos, va san-toloya neva piskuyuna wali 1668 is 1694 tantar. Jean de la Fontaine koblir, bak gazugal ke Louis XIII, ba 08/07/1621, koe Château-Thierry, koe glastafa yasa. Bata gorar da in di govanpir partik aze stakser, tison 19-daf, ko reila koe Paris. Vexe in me tir lofitckiraf ta alkopa dam tegira ok arienteem. Antafa suterotura va in vanimpar. Koe Paris in va yone suterotxe isu dere ulixe isu vefaxe nobar. Gadikye gorar da va in gokurer. Bak 11-aksat 1647, Jean de la Fontaine do Marie Héricart zo kurer. Inya tir 15-daf. Ba tanda abdion, Jean de la Fontaine, gan gadikye xuvanon, va flieba ke "Gadesik va Laveem is Aaleem" koe vowidava al luster. Vexe va blira koe Paris abdualbar. Tir erbadebalakirajaf. In is kurenik tid bozakirapaf.

Bak 1658, viele rawayane gadikye awalker, La Fontaine sol kurenik solparsawer. Pu Fouquet Gadepesik va Erbaxe ke Louis XIV jotaf gazik zo atoer aze va inaf gelukaf ezlusik vanpir. Vexe Fouquet zo basflir, bak 1661, nume La Fontaine drapuyus va intaf tengasik godimfir va Laveem is Aaleem ke Château-Thierry. Bak 1664, Bouillon dacikya, ziavik ke Mazarin, ta irubara koe widava pir, aze pu La Fontaine erur enide zo relander. In va Yon reiz puvepes va dacikya medolenon suter. Ta remblira govanpir "zanis gentilhomme" ke Orléans dacikya. Koe Luxembourg berma, ke dana va mateleem karolar, tori moraca mo azega ke grenyafa guazikya zanolur. Do Molière is Racine is Boileau al joawer ise giopon aneyar ta seotara va gazafi turwi. Colbert, warzaf Gadepesik va Erbaxe, obrar enide in ile Aboyikeem zavzar.

Bak 1668 La Fontaine va taneaf Kudak piskur. Va turwi meseotason soe. Bak 1671, va flieba adim lajudimdoler. Bak kadimifa tanda Orléans dacikya awalker. Jean de la Fontaine tir erbiskaf, riwe copaf. Tir De la Sablière Weltikya, arayakirikya, malasa va omeltikafa yasapa, dana va in emuder ise vistaler ise kogestur. Sintafa naca 20-don jijatar. La Fontaine soe me ten argeweyer. Yon Warzaf Reiz, piskuyun bak 1674, va Gazik volpuved acum zo poud. La Fontaine, ware erbiskaf, va gadafa mona ke Château-Thierry godoler.

Bak 1678, in va toleaf Kudak piskur ise pu Montespan Weltikya vaon tarizar, ta vanimpara va inafa tengara. Inafa norluca adim zo kagruper : Yona Kuda pridud, do Esopos is Phedre in zo dolunyer. Bak 1683, Colbert awalker. Ta Francavaf Cultim La Fontaine va int atoer. Vexe Gazik va arevlara va libura askir abdi da tenon naler. Ba awalkera ke De la Sablière Weltikya, bak 1693, in akolawer ise abdiplekur da va volalkaca ok volceakaca mea piskutur. Bak ironokafa tolda in bosgir ise va uja jeber lize va kustovudera blikeson lavulkur. Ba 13/04/1695 awalker.


Jean de La Fontaine

Jean de La Fontaine, delt ke Hyacinthe Rigaud (1690)
 Blira 1621-1695
 Ava Francava
 Suterind Kuda, Ezlopa
  Suterot