Imwugal ke rena

Teliz mal Wikikrenteem.

Grablé kal exulera, aneyara

Imwugal ke rena
Vietnamafa vunda


Lekeon grutakirafa listapafa yikya tiyir. Varteyena kan renapara gan guazaf layesik, bas in va inafa skera va kalskunhura al kazawayar. Batinde yikya al vanpiyir tela lokiewafa layesikya ke patcta nume ta lustera va inafa ribiega se lantan yo sumupon piyid.

Wison da intafa skuna kobara tiyir maneke kiewatcafa, in zo felbeyer. Gadikye va ugal is keuca maneke al ektuyur ! Baton, wale nasbeafa rena is exavafa albara, blira ke jotaf layesik traspuyur.

Vexe guazik pezteyer vielvielon tuacawes nume va intafa nasbeikya xuvayar ta da in kurer. Kalaf gu intafa noelafa blira, va mecoba tozion djugildeyer. Azon, va gadikye me djupuidason, turkon ve naleyer, me roviskon…

- Gadikye, larde rinafa kuranira tir mana, kureté. Anton tanon kredatá : jinafa takra mu tel grulayetes va kotunaf lag dem meroroatalene raltuke. Fem en gotitir afriskaf.

Guazik, kalarsaf wison va progenhesa inya, meklabuson ve naleyer. Ko kotrafa gola boreon razduyur da nasbeikya tiyir gokurena ise va tela kreda bazeyer. Jontik espusik bam ve frubdeyed vexe yikya, kotviele levkipesa, rindeyeson va sinaf lay se ise kotviele trasison va konaka afra va sinafa abdugara vewayar. Me keyuweson ta da kurer, gan bata warzafa vefara toz zo relandeyer.

Koe aalxo, antafe yikye bliyir, ke dan antaf dositik yo tiyid sveri is aal. Dere layesik, gan gadikya xonukayasa weti konaka tanda va exava al raveyer.

Nisu va jotafa kuretena layesikya va in ve artayar nume ve trakuyur da boreon dulzer. Me zo kaliyir da inya tiyir listafa is zijnafa ? Vexe yikye boreon gripokoleyer : ede layera va afriskaf lag va in me zvakeyer, kevoke ta seotara va meroroatalene raltuke va birga me grupeyer ! Wison da in tiyir volkalaf, sveri nik vaon ve powayar :

- Va birga zilitisa pu rin va bata yikya en djugrupel ?

- Kax, jinafa swava gan batcoba anton zo kereler voxe men al trasí !... in gripokolenon ve dulzavayar.

- Ten temel ise va jin radimelanil ! sveri ve kaliyir.

In koo aalxo ta kakevera va tana nikya va in aludevon ve vanstayar. Diolikya bam ve kaliyir :

- Ta seotara va aneyana kseva, va kot geltnaav ke rinafa nuba aze iskel da fortey va lay ksevar.

Pokolepeson, yikye ve dimpiyir aze va pirdaks ke diolikya askiyir. Lay va intafa lolistafa kseva ve nariyir ise razduyur da kotunaf lag tiyir. Vexe jotaf espusik va slik fortey al ziliyir nume boreon astirbon ve vanpiyir. Diolikya, mafelasa va inafa takreluca isu giuca, gan sveri ve zo elogayar nume ta grelera piyir.

Nemon griakolayan, va intaf lag, va klaim, pu yikya bam ve bureyer. Battan me loon ve rokrulayar : kseva ke lay tiyir liston raltukaf ise fem tiyir afriskaf. Ostik, yikye tiyir zijnafe is plinafe. Sin va sint boreon ve kureyed aze koe aalxo kalon bliyid. Kirka ke yikye tiyir kotunafa tori jotafa tolonga ise sveri is aal va dositik ke intaf nik kalion vanikatcuyud.

Vexe batcoba tiyir vulkuson va awuzawera ke ar espusik yo. Tan, loriyomes dam artan, ve gorayar da va int jaxadar nume ve rieteyer. Grupeyet da gazik va listafa yikya se karolayar nume viele va tana jugemeyer, mecoba roweyonayar da in va dositik doon askir. Kotkane… Sardjeyen espusik va menpera ke yikya bam siskepeyer inde gazik ve gorayar da ko berm va in davon djugalpeyer.

Impavantason da koe widava kurenikye va sinaf lay se doleyer, gazaf sayakik yo va yikya batenide ve guldeyed. Sveri ve yawapayar da va int walplekur vexe ton meka sa ve zo atayar. Koe gojuca, yikya, ta da va raltukaf klaim layeyen gan kurenik vanburer, nemon ve ugaldiyir. Ba artlanira va berm, ta da icde kiewatca va sopura va gazik walzed, sayakik yo va inya guantamayad. Gripokoleyen is vewas va abdiplekuna enipa, layesik va bat abic verast ve impavantayar nume ve kseyer, kan raltukaf klaim va int rumkason…

Icde bat warzot givanon, gazik ve tuyatkaweyer maneke ve benplekuyur da alto zo konomulkar aze sumon sumapon zo vanstar, ta da in va pulvira icde inya meviele anamgildeter.

Remion, kurenikye kou widava al dimpiyir. Akoyen gan gracuca ke kurenik, va awalkafi sveri boreon ve trasiyir. Aal va sokiyisa coba puon pwadeyer. Nigoviskaf, in tite aal va sveri kotawayar. Azon, laizon koswan, va diolikya ixam tolon agralapon pomayasa denvulteyer. Battan ve pirdayar :

- Til keaf, nik ! Antafi sveri va rin ropomar.

- Vexe in tir awalkaf. Jin vlev aal vaon su kotawá ! in ve evieyer.

- Batcoba tiyir tela lokiewafa gonaskina coba, diolikya ve karavalduyur. Va imwugal kel aze sveri dimblitir. Bam va gonaskine pu rin kalitil.

Gabentafe vox pokolemese, yikye mekeon keyer da fentugal tenuwer. Sveri, ba taneafa imwa se ke imwugal, ba gazda tite aal lize tiyir kotawanafi, ve divmodayar. Katrasira do intaf dositik yo tiyir kontesa vexe kaliapon, pokolepeson, yikye va pulvira ke diolikya ve setikeyer.

- Pu jin kalil, sveri, rin til tel antaf rodimdrasus va jinafa renanikya, ve abreyer.

- Ko berm lanil, sveri nik ve benplekuyur, aze va raltukaf klaim ke kurenikya dinel ! Azon, erutul da xo lize alto dayker pu rin zo bazer ! Viele titil, mo nomulk va klaim plekutul aze ketel !

Yikye van berm boreon ve mallaniyir ise va kotcoba pirdayana gan nik askiyir. Seotayane va klaim, oulon ve etrakayar ise niga moe gexata lingeweyer. Tan sayakik, konten gan gabentuca ke layesik, pu in va xo lize kurenikya daykeyer, bazeyer. Mekeson, in ve tollaniyir ise ta da va mevtava zomer abrotcion abrotcipon laniyir. Tuke bazera se ke susik, va arula lize nomulk al zo jovleyer, volwavdon ve trasiyir. Oulon ve zidepeyer ise ve tiyir gabentapaf. Motidason va puidera, kalion ve dimaytcuyur aze, inde batcoba al zo dojeniayar, mo nomulk va klaim ve daykayar aze keyer.

Gazdeldeon, tozi afizara, yikya va moxinaf flint ve divlaniyir aze va renanik ve dimtrasiyir. Battel keyuweyer nume den sin vaon tixolapon dimstayar. Tolwison va nikya sveri is aal ve tiyid kalapaf aze kottan yo tamapon di bliyid.

Mali bat vartaf viel, aal imwugalon sokimwer ise kota imwa sotir raltukanhafa. Meroroatalena.

  Xanto  
Vergumvelt Le printemps de l’amour
Sutesik -
Piskura -
Ava Vietnamava
Evla -
  Kalkotavara  
Vergumvelt Imwugal ke rena
Kalkotavasik Jacques Nguyen Tanh
Piskura -
Evla 2005
  Krentduga  
Webesik Nguyen Tanh
Krentduga Image:75%.jpg Gotuenana