Idatcol is deaxolya

Teliz mal Wikikrenteem.

Grablé kal exulera, aneyara

Idatcol is deaxolya

Rwaltreiz : Idatcol is deaxolya

Darekeon. Lana deaxolya va wico koe aalxo mu int al vegedur aze va yon oc al bliar. Aneyatason va werdxa jontikviele gimallanir. Moi inafa mallanira, deaxoloc va tuvel ixatcad aze vol divlanid. Dimlanison deaxolya va tuvel tazer ise dankagar :

Deaxolam, abegaf oc !
Fenkuc, kalion fenkuc ‼
Jin deaxolya kou aalxo dimlaní,
Va pibaf werd al mulé,
Va fedafa lava al ulí.
Jinaf vrod traspupur,
Va krizeem pumar, Ko tawa eglur !

Deaxoloc mu gadikya ampuson fenkud. Ina va sin vanvrodar aze ko aalxo gin lanir, edje deaxoloc jontolon buded.

Lan idatcol va kotcoba al gilder nume va gracuca ke deaxolya impavantar ise va wico vanlanir aze kan pudapa iegar :

— Nazbeikam, ekoltaf nazbeik, vere fenkuc ‼ Winafa gadikya batlize tigí, dem jontik vrod is lava bene krizeem !

Deaxolc dulzed :

— Me, me, batcoba me tir puda ke cinafa gadikya ! Inafa puda tir namafa ise va amidafa ewa gikalir.

Idatcol mallanir aze va int preyutar. Dimlanison deaxolya va tuvel tazer ise dankagar :

Deaxolam, abegaf oc !
Fenkuc, kalion fenkuc ‼
Jin deaxolya kou aalxo dimlaní,
Va pibaf werd al mulé,
Va fedafa lava al ulí.
Jinaf vrod traspupur,
Va krizeem pumar,
Ko tawa eglur !

Deaxoloc isked da ina kolanir aze mbi pwader da ikoraf idatcol estutuson al pir. Deaxolya va sin vanvrodar aze gin lanir, juikeson da mu kontan co gukoes kan pudapa is me ravlemravlemon tolkalis va inyona ewa vol di fenkud. Biwe illanir viele idatcol vanvulter, va tuvel tazer aze kan pudama dankagar :

Deaxolam, abegaf oc !
Fenkuc, kalion fenkuc ‼
Jin deaxolya kou aalxo dimlaní,
Va pibaf werd al mulé,
Va fedafa lava al ulí.
Jinaf vrod traspupur,
Va krizeem pumar,
Ko tawa eglur !

Deaxoloc va tuvel fenkud, idatcol ko wico iper aze va kot oc vumber, i va kot vaxe tanoy gelbeyes koe cade. Deaxolya dimlanir, vexe kore dankagar, metel dulzer. Ina vanlanir, va meixatcayan tuvel platir aze va letafa mona wir. Ko cade disuker nume va tanoy oc kosmar. Raveson va volkaluca, mo starka fandizawer ise borer ise arubar :

— Ax, kimtaf nazbeik, abegaf oc ! Tokdume, tokdume mu ikoraf idatcol al fenkud ? In va win al vumber nume tí gabentapaf.

Idatcol va ina gilder nume va wico kolanir aze kalir :

— Ox, sulemya, sulemya ! Va tokcoba re kalil ? Gu tokcoba va jin buntul ? Kle ko aalxo lanil ‼

— Me, sulemye, me djugozá.

— Pil ‼ Idatcol karaker.

Sin ko aalxo mallanid aze kabdu kela artlanid lize reliez ke drendaf yegald wan tid klubaf. Deaxolya pu idatcol kalir :

— Ede va bata kela lagrablet, sulemye ?

Sin va batcoba askid. Idatcol grabler voxe ko anteyawesa kela luber. Inaf jivot roidar, deaxoloc divvawad aze van gadikya welved. Batvielu sin kalon blid, vanpid ozodik, va bifaja taruted.

  Xanto  
Vergumvelt Волк и коза
Rwaltreizak Народные русские сказки
Sutesik ayoltik
Piskura Александр Николаевич Афанасьев
Ava Rossiava
Evla 1855-1871
  Kalkotavara  
Vergumvelt Idatcol is deaxolya
Kalkotavasik Damien Etcheverry
Piskura
Evla 2014
Klita
  Krentduga  
Webesik Troubadour
Krentduga Image:100%.jpg Tuenayana

Yunkeks ke Ivan Bilibin


   
   

Народные русские сказки (Rwaltreiz ke Rossia)