Fixulupa

Teliz mal Wikikrenteem.

Grablé kal exulera, aneyara

Fixulupa

Rwaltreiz : Fixulupa

Darekeon. Guazikye is guazikya tid. Lanviele guazikye erur :

— Va fixulupa mu jin burmel, guazya ‼

— Vexe kum tokcoba rotaskí ? Va regelta me dadit.

— Ex, guazya ! Ko blotxo lanil aze ta ark ke regelta lafasial ‼

Guazikya va wilwilt narir, kanon fasial ise tsentel nume va toloy nubacek dem regelta tredur. Va zom kan eeftafa vayna feredjar, va fixulupa koe punta gerinser aze mo kadoma ke dilk tufentatason aykar.

Fixulupa millize zavzagimir voxe azon toz tanamur : mou dilk mo starka, mou starka mo sid, mou sid van tuvel, aze vamoo pikay ko zeria grablur, mou zeria mo rapsay, mou rapsay ko kusk, kou kusk kadim tuveli, lolodilon.

Fixulupa mo kelda tanamur aze va libol kevnir.

— Fixulupa, fixulupa ! Va rin fu estú !

— Va jin me estul, libol, oblakapik !? Mu rin dankatá, ~ fixulupa kalir nume toz dankagar :

« Tí Fixulupa, Fixulupa,
Al zo fasiá ise al zo tsenté,
Kan eeftafa vayna al zo feredjá,
Koe punta al zo gerinsé,
Poke dilk al tufentawé,
Va guazikye al divvawá,
Va guazikya al divvawá,
Ise va rin libol drikon fu divvawá !»

Nume fixulupa gin tanamur aze vere griawir. Wan tanamur aze va idatcol kakever :

— Fixulupa, fixulupa ! Va rin fu estú !

— Va jin me estul, lukoptidatcol !? Mu rin dankatá, ~ fixulupa kalir nume toz dankagar :

« Tí Fixulupa, Fixulupa,
Al zo fasiá ise al zo tsenté,
Kan eeftafa vayna al zo feredjá,
Koe punta al zo gerinsé,
Poke dilk al tufentawé,
Va guazikye al divvawá,
Va guazikya al divvawá,
Va libol al divvawá,
Ise va rin idatcol drikon fu divvawá !»

Nume fixulupa gin tanamur aze vere griawir. Wan tanamur aze va rupol kakever :

— Fixulupa, fixulupa ! Va rin fu estú !

— Bufux, rin rupol, va jin me rotestul !

« Tí Fixulupa, Fixulupa,
Al zo fasiá ise al zo tsenté,
Kan eeftafa vayna al zo feredjá,
Koe punta al zo gerinsé,
Poke dilk al tufentawé,
Va guazikye al divvawá,
Va guazikya al divvawá,
Va libol al divvawá,
Va idatcol al divvawá,
Ise va rin rupol drikon fu divvawá !»

Nume fixulupa gin tanamur aze vere griawir. Wan tanamur aze va bresitol kakever :

— Kiavá, fixulupa ! En til listapaf !

Fixulupa dankagar :

« Tí Fixulupa, Fixulupa,
Al zo fasiá ise al zo tsenté,
Kan eeftafa vayna al zo feredjá,
Koe punta al zo gerinsé,
Poke dilk al tufentawé,
Va guazikye al divvawá,
Va guazikya al divvawá,
Va libol al divvawá,
Va idatcol al divvawá,
Va rupol al divvawá,
Ise va rin bresitol drikon fu divvawá !»

— Mana listafa danka ! ~ bresitol kalir. ~ Vexe, fixulupa, tuguazawé nume gildejé. Mo jinafa gariza debanyal ise va danka gire dankagal !?

Fixulupa mo gariza ke bresitol grabler aze va mila danka askir.

— Va fixulupa grewá ! Va mana listafa danka, gin djuterektá ! Mo jinaf yoy debanyal aze bocatomon dankagal !? ~ bresitol yoysotceson kalir.

Fixulupa moon grabler, nume bresitol, xups, va ina estur.

  Xanto  
Vergumvelt Колобок
Rwaltreizak Народные русские сказки
Sutesik ayoltik
Piskura Александр Николаевич Афанасьев
Ava Rossiava
Evla 1855-1871
  Kalkotavara  
Vergumvelt Fixulupa
Kalkotavasik Damien Etcheverry
Piskura
Evla 2014
Klita
  Krentduga  
Webesik Troubadour
Krentduga Image:100%.jpg Tuenayana

Yunkeks ke Ivan Bilibin


   
   

Народные русские сказки (Rwaltreiz ke Rossia)