Diolikya

Teliz mal Wikikrenteem.

Grablé kal exulera, aneyara

Diolikya

Reiz : Diolikya

Konviele lekepon tiyir nyobrikya dem toloya nazbeikya; tela loklaafa seye aflica is gexata vektapar cugeke kontan wis va ina va gadikya fowiyir. Battan tiyid volplinapaf is intotcapaf eke metan do sin robliyir. Tela toleafa, dum deltany vey gadikye seye zijnuca is teluca, tiyir tana lolistafa rowina yikya. Milinde kottan va oltavik tire renar, bata gadikya va taneaf nazbeik kalrenayar, voxe miledje va toleaf akladayar. Askiyir da bantel koe burmotaxo estuyur ise kaikkobayar.


Vanmiae arcoba, bat kimtaf velik ta lavalirdera art loon toloy decitmetrolk male mona tolon vieleon golaniyir aze va kotrafa abdapa gokobureyer. Konviele bene sul tigiyir, wawikya blikesa ta kazawara va lava vanlaniyir.

— En, gue, ayaya, ~ bata listikya kaliyir.

Nume dure eskelason va abda, ko telo xonyo ke sul lavalirdeyer, aze atoeyer, wan levgison va abda enide ina lodrikon uliyir.


Ayikyanya, uliyison, kaliyir :

— Til listapaf is vonapaf is telapaf, batdume va tanoya gruta pu rin govebundá, ~ lecen va tazuk ke widawawik al nariyir enide wiyir eke teluca ke bat yik co-tiyir. ~ Va lana gruta zilí nume ba kota kalitina pulvira Imwa ok Aka va rinaf art divnitid.


Viele bata listikya va mona artlaniyir, gadikya buuyur kire ina mal sul gaverson dimlaniyir.

— Pu rin ixererú, gadya, ~ kimtikyama kaliyir, ~ kire gaversé.

Nume kalison va batyon ravlem, toloya Raltada isu Mard isu Duzap va inaf art divniyid.

— Va tokcoba wí ? ~ gevapana gadikya kaliyir ; ~ folí da mard is duz va inaf art divnid. Toklizu batcoba tir, nazbeya ?

Tiyir taneafa toma da ina gu nazbeya yoltayar.

Kimtaf velik va kota coba sokiyisa ixakon pwadeyer, kabuson va jontik duz.

— Arse, ~ gadikya kaliyir, ~ va nazbeik gostaksé. Djay Fanchon, va plek divnis va art ke berik viele in pulvir, wil. Kas va mila gruta me djudadil ? Anton lanil kal sul aze lavalirdel, aze viele wawikya va ulira pu rin erutur, telanyon di zilitil.

— Vol, ~ fikikya dulzeyer, ~ kal sul lanití.

— Kuraní da di lanil, ~ gadikya dakiyir, ~ ise fure.


Ina laniyir, vexe wan buuson. Va lolistafa dilgavafa kurdaga ke mona al nariyir. Va sul su artlaniyir viele va cuison vagekirafa Jiomikya divlanisa va aalxo ve wiyir. Bantanya vanlaniyir ise va ulira eruyur : tiyir milafa Diolikya awiyisa lent berikya, voxe su bevulayar Sersikya dem vadjes vageeem enide rabateyer eke volteluca ke bata yikya di tiyir.


— Kas batliz al laní, ~ bat fikaf intotcik kaliyir, ~ enide va ulira di zilí ? Vexe, berde, va dilgavafa kurdaga dovoron al vanburé nume va ulira pu Weltikya rozilí ! Boyá, benon ulil ede djumel.

— Til telansaf, ~ Diolikya askiyil, me zideson. ~ Kle ! larde til puvegansas, va lana gruta zilí nume ba kota kalitina pulvira, perake ok gemu va rinaf art divnitid.


Vielu gadikya va ina kozwiyir, ieyer :

— Kle, nazbeya !

— Kle, gadya ! ~ fikik dulzeyer, kabuson va tanoya zamyala isu gemu.

— Ox Kelt ! ~ gadikya divieyer, ~ va tokcoba batlize wí ? Berik tir golde batcoba, pu jin dodeter.

Nume ina vere vulteyer enide va in di alier. Kimtaf velik ko pokefo aalxo ta giwara otceyer.


Nazbeikye ke Gazik, dimlakison va tcabanyera, kakeveyer nume va in listapaf wison, eruyur va coba in antaf askiyir ise dume boredayar.

— Kax ! Weltikye, gadikya div mona va jin su aloyar.

Nazbeikye ke Gazik va aluboy ok tevoy mard is liote duz divnis va inaf art wiyir, nume maleruyur lizu batcoba tiyir. In va kotafa stuva pwadeyer. Nazbeikye ke Gazik korenayar, ise krupteson da mana gruta loon dam betcoba rofirvina ta kurera sovodar, ko Berma ke Gazik gadikye, lize di kureyer, va in malstayar. Luxe berikya, ina askijiyir nume zo bogayar cugeke denu int gadikya miv di aloyayar. Nume, bat volkalik, arti vulterapa vox trasison va metan emudes, kene aalxo di awalkeyer.


LIDOK

Duz is erba
Mo korik rotaskipid ;
Wori pulviranya
Lopofa is lodroe tid.


AR LIDOK

Teluca va sugara askoar,
Va abica puvotera imaxur,
Vexe moion ok vamoion zo gabler,
Voxe loviele vaon me trakut.

  Xanto  
Vergumvelt Les Fées
Reizak Les Contes de ma mère l'Oye
Sutesik Charles Perrault
Piskura -
Ava Francava
Evla 1697
  Kalkotavara  
Vergumvelt Diolikya
Kalkotavasik Elisabeth Rovall
Piskura
Evla 2013
Klita
  Krentduga  
Webesik Seramikya
Krentduga Image:75%.jpg Gotuenana

Yunkeks ke Gustave Doré


   
   

Les Contes de ma mère l'Oye ke Charles Perrault