Bruxa ke Finist Oklaflaweza

Teliz mal Wikikrenteem.

Grablé kal exulera, aneyara

Bruxa ke Finist Oklaflaweza

Rwaltreiz : Bruxa ke Finist Oklaflaweza

Darekeon. Ayikye va baroya nazbeikya dikir : taneafa is toleafa tid ekoltafa, ironokafa tir morafa is exomikany. Lanviele, gadikye kal widava fu mallakir nume erur va tel yal sina galped. Taneafa kalir :

— Va tayizarvi pu jin lustel ‼

Toleafa dere galper.

— Voxe rin, abdirenanya, va tokcoba galpel ? ~ ine pu ironokafa erur.

— Va bruxa ke Finist Oklaflaweza.

Ine va sina isker aze toz lakir ; va lay tori toloya nazbeikya luster, voxe va bruxa ke Finist Oklaflaweza me trasir. Dim mona, va lusteks pu toloya taneafa zilir nume felber.

— Voxe rin, ~ pu ironokafa kalir, ~ va rinafa djumena bruxa me al trasí.

— Rotaxe, ~ ina dulzer, ~ diretomon rotir loon ervayetel.

Toloya ekoltikya va gem mu int epud ise va ironokikya mepulvisa kipegad.

Gadikye kal widava gire fu mallakir ise erur :

— Kle, nazbeik, va tokcoba dimvanburetena galpec ?

Taneafa nazbeikya isu toleafa va dozga imaxud, ironokikya kalir :

— Va bruxa ke Finist Oklaflaweza pu jin lustetel ‼

Gadikye ko widava lakir, va toloya dozga luster voxe va meka bruxa. Dim mona, kalir :

— Goxe, nazbeya, va rinafa djumena bruxa men gir !

— Rotaxe, gadye, diretomon loon ervayetel.

Gadikye kal widava ware gire fu mallakir ise erur :

— Kalic, nazbeik, va tokcoba dimvanburetena galpec ?

Toloya taneafa dulzed :

— Va oblakakenda mu cin lustetel ‼

Ironokikya barkalir :

— Va bruxa ke Finist Oklaflaweza mu jin lustetel ‼

Gadikye va moavafa oblakakenda luster, va bruxa bitavon aneyar, vexe metan va man kaliks al gilder. Ine dimlakir, erolane. Poke tuvel ke widava, va guazikyeme dem boram koe nubeem kakever.

— Va tokcoba batlize dagil ?

— Va bruxa ke Finist Oklaflaweza.

— Tokdroe ikaon erul ?

— Va decitoy rubla talolk.

Gadikye va itaya doder aze dem boram ampuson dimdenlakir. Baroya nazbeikya emuded.

— Kle, abdirenanya, ~ pu ironokafa kalir, ~ va yal adim gí ; batse in, naril ‼

Ironokikya daavon riwe grabler, va bor narir, vaon dun kutcar, kev takra xuvar. Kaiki sielestura, kottel ilavasenyar ; ironokikya, antafa koe mawa, va bor fenkur nume bruxa ke Finist Oklaflaweza vere buber, mo sid luber aze vanpir listafe sersikye. Sin va yona krenugafa renasa ewa walpulvid. Toloya taneafa berikya gilded nume bibed :

— Do toktan pulvil, berya ?

— Do int ! ~ bata listikya dulzer.

— Kle fenkul ‼

Sersikye mo sid ins luber nume gin vanpir bruxa ; ina ko bor dimplekur aze tuvelfenkur. Berikya kalaneyad, voxe va metan ! Moida mallanid, pune listikya va dilk fenkur, va bruxa divplekur aze kalir :

— Talal, bruxa, koo taya ‼ Keson til nuyaf ‼

Bruxa vanpir flaweza aze maltalar.

Diremielon, Finist Oklaflaweza kev listikya dimtalar ; va yona daavafa ewa walpulvid. Taneafa nazbeikya, gildeyeson, walzeteson va gadikye malvulted :

— Gadye ! Berya va kontan mielon gilemuder ; bantan batlize ae tigir ise doon keyakser.

Gadikye ranyar, van mawa ke ironokikya lanir, kolanir… Vexe sersikye dimon tise bruxa koe bor tigir.

— Ax ! Man facilik tic ! ~ van toloya taneikya buur. ~ Tokdume batinde emodac ? Va intyona arienta kre viunsuc ‼

Direvielon, toloya taneikya urbed : ba miel, va bil vanmadad aze va konak gabes wed isu veel tuopad, aze moe dilk ke ironokikya moplekud. Finist Oklaflaweza arttalar, rem dilk giopon lakotalar voxe va wilteem volins bakar.

— Done, listya ! ~ kalir. Ede va jin gin djukevlanil, ilon aneyal, ilapon, arte tamava ‼ Va baroy azilaf perfejuleem lametel, va baroya jenukafa peya arisetel, ise va baroya raporafa begxa estutul abdida di kevlanitil !

Okie, listikya keniber : soe rem moda va bata gabentafa dewitca gilder voxe me roranyar. Ba sielon divmodera, va dilk broeyen gu wed is veel wir lizu fortey belaxar. Nubazokever :

— Lorik ! Berikya va renanik al bakad !

Vere va mona bulur. Ko glotcaxe vulter ise va baroya jenukafa befoltafa peya epur, va int gu baroya raporafa begxa eksar aze va Finist Oklaflaweza koaneyar.

Lanir, lanipir, va taneaf perfejuleem lamer, va taneafa peya ariser, va taneafa raporafa begxa estur ; artlanison va koridxa, tuveltazer :

— Monikye, monikya ! Bak tanoy mielcek jandec !?

Guazikya dulzer :

— Zo emudeckel, listya ! Tokliz lanil, ekoltya ?

— Kaxe, savsya ! Va Finist Oklaflaweza aneyá !

— Ax, listya, gokeldonapatal !

Diregazdon, guazikya kalir :

— Den jinafa toleafa berikya dalebam lanil ‼ Ina sopirdanyar. Ise batse va coba pu rin zilí : va dilgavafa starka is moavafi krafoli betatasi va femaj gu moavafem.

Azon va deora narar, mo kelda tanamusir aze kalir da listikya di radimelanir. Oyikya grewar aze kadime deora lanir.

Arti lan ugal, va toleaf perfejuleem lamer, va toleafa peya ariser, ise va toleafa raporafa begxa estur ; adim deora va koridxa artnir :

— Budikeem ! Va wawafa oyikya bak tanoy mielcek jandec !?

— Zo emudeckel ! ~ guazikya dulzer. ~ Tokliz lanil, listya ?

— Savsya, va Finist Oklaflaweza aneyá.

— Gokeldonapatal !

Diregazdon, guazikya va dilgavaf azekol is moavafo ato bulkar aze den taneafa berikya stakser. Bantel gruper lize Finist Oklaflaweza zo rotrasir.

Listikya va guazikya kiavar aze mallanir ; lanir, lanipir, va bareaf perfejuleem lamer, va bareafa peya ariser, va ironokafa begxa estur, abdida deora va koridxa di artlanir. Oyikya tuveltazer, kalison :

— Budikeem ! Va wawafa oyikya bak tanoy mielcek jandec !?

Guazikya awir :

— Kolanil, listya ‼ Zo emudeckel ! Toklizu artlanil, tokliz kle lanil ?

— Savsya, va Finist Oklaflaweza aneyá.

— Ax ! Trasira va ina tir wavdapafa ! Finist koe lana widava re soker lize va nazbeikya ke begonyik al kurer.

Diregazdon, guazikya pu listikya kalir :

— Batse va exava is moavaf veel tori rin : va exava opelon gil, bam veel ant miv di fider. Tetce, ervayel ‼ Viele dene begonyik tigitil, wetce zanisik segutul ‼

Kaliks num askiks. Listikya, artlaniyisa va begonya, wetce zanisik segur ; kobapar, va cade tuidular, va lava burer, burmotar. Tilikya dun rolzar.

— Lorik, grewá ! ~ pu nazbeikya kalir. ~ Va agralafa is bitavafa kwikya dikit : va kotcoba medirganon skur !

Okie, kaiki exomafa kobara tenukeyena, listikya va dilgavaf starka is moavafi krafoli narir aze toz femur ; epun fem tir kum karafa moava. Wison va batcoba, begonyikocya diviegar :

— Ox, listya ! Kas va rinafi vefasiki pu jin me co dolel ?

— Mes !

— Tokdroe ikaon kuranil ?

— Iskel da va mielcek do rinafe kurenikye di tiskí ‼

Battel finer. « Baix ! ~ trakur. ~ Pu kurenik, va uliba kenibesitisa rozilí, nume kan bati krafoli, gadya is jin, va tufa askitit !»

Vexe Finist dene mona me tigir ; koe kelt afizcekon dun azenter aze ba siel oxam dimtalar. Kottel benazegar ; zanivason listikya va in dun kakdisuker ; voxe ganon me zo kagruper. Begonyikocya va kenibesitisa goa ko ulida gimar aze senyesir aze pu kwikya kalir :

— Ko inafa mawa lanil aloyatason va nefta ‼

Listikya va nefta aloyar ise arubar :

— Divmodel, kle divmodel, jinaf Finist ‼ Batse jin, rinafa listya, batlize tigí ! Va baroy azilaf perfejuleem al lamé, va baroya jenukafa peya al arisé, va baroya raporafa begxa al estú, aneyason va rin, renanye !

Vexe Finist keniber, megustaf ; aze miel dilizer. Direvielon, listikya va dilgavaf azekol konarir aze va moavafo ato jonkaweso tanamer ! Begonyikocya, vigrokana, kalir :

— Va rinafi vefasiki pu jin dolel ‼

— Mes !

— Tokdroe ikaon kuranil ?

— Iskel da va ar mielcek do rinafe kurenikye di tiskí ‼

— Ae, finé !

Vexe Finist Oklaflaweza koe kelt afizcekon ware al azenter nume ba siel oxam dimtalar. Kottel benazegar ; zanivason listikya va in dun kakdisuker ; voxe ganon zo somekagruper. Begonyikocya va kenibesitisa goa ko ulida gimar aze senyesir aze va kwikya stakser enide ina va nefta di aloyar. Ware retomon, kore borer ise rozar, kali gazda Finist megildeson dun keniber.

Ba bareaf viel, listikya va fiderexava narir aze veel miv sopur, kalskuson va cuisaf lag. Begonyikocya, skebuna, kalir :

— Va rinafi vefasiki pu jin dolel, listya ‼

— Mes !

— Tokdroe ikaon kuranil ?

— Iskel da va bareaf mielcek do rinafe kurenikye di tiskí ‼

— Ae, finé !

Sielon, ba dimtalara ke Finist Oklaflaweza, kurenikya va kenibesitisa goa ko ulida gimar aze senyesir aze va kwikya pokon stakser enide ina va nefta di aloyar. Listikya va nefta aloyar voxe arubar :

— Divmodel, tetce, jinaf Finist ‼ Batse jin, rinafa listya, batlize tigí ! Va baroya jenukafa peya al arisé, va baroy azilaf perfejuleem al lamé, va baroya raporafa begxa al estú, aneyason va rin ! Vexe Finist Oklaflaweza wan keniber, megustafa.

Ina borer ise rozapar ; laizon, tana ikuza mo tcor ke Finist luber. In vagrableson divmoder :

— Ax ! ~ kalir, ~ koncoba va jin su anteyar !

— Finist, jinaf Finist Oklaflaweza ‼ ~ listikya dulzer. ~ Batse jin, batlize tigí ! Va baroya jenukafa peya al arisé, va baroy azilaf perfejuleem al lamé ise va baroya raporafa begxa al estú, aneyason va rin ! Tir bareaf miel viele pu rin pulví, vexe rin dun kenibel, me dulzel !

Finist Oklaflaweza va ina adim kagruper nume pester tudaavarsana. Sin vere djukurotced. Ba gazda, begonyikocya va mawa vlardafa rabater. Pu gadikya temer. Bantel volmiv vansorkar aze va sin onkar. Lakir, lakipir, va baroya guazikya denolakir, voxe va Finist Oklaflaweza me lajuvebidur : bantel diolaskon al awir !

Toloy renasik va mona ke listikya arttalad ; Finist mo sid ins luber nume vanpir bruxa ; listikya va ina tredur aze kev mou palser aze pu gadikye va int atoer :

— Ox, abegafa nazbeya ! Foliyí da tiyil awalkaf. Toklize jontikedje tigil ?

— Befoltuson.

Okie, tire dareviel ke Tumtafa Safta tir, nume gadikye is intyona nazbeikya gazdon bliketeson fu lanid.

— Tetce, nazbeya, ~ pu ironokikya kalir, ~ do cin pil ; tir man afizany.

— Gadikye, va mecoba rodiskina dagí.

— Va cinyone vagenye ‼ ~ berikya draged.

— Kaxe, berya, sine me tid vas jinaf lum ! Abdualbá da deneon di zavzagí.

Gadikye is toloya nazbeikya gazdon bliketeson mallanid. Bam listikya va bruxa divplekur. Ina mo sid ins luber nume vanpir sersikye. Ine van dilk azdar, nume kreme yone vage isu ingaxa is moavukafo diremuko gepoyted. Sin va int vaged, va diremuko rundanyad aze kal uja lakid. Banlize mo taneafa ema va int rundad ; korik nued : « Toka tir bata sersafa tolonga ?» Teni tujbora, abdi kottan dimlakid ; mea diremuko, mea vage, mea ingaxa, sersikye dimon tir bruxa. Gadikye is toloya nazbeikya dimlanid.

— Ox, berya ! Medositason va cin koe uja, al kiovel. Banlize kone sersikye is listapafa sersikya tigiyid.

— Rotaxe, berya ! Gildeson va win, va sin miv fowí.

Direvielon, milcoba ; bak toleaf direviel, viele sersikye is listikya va diremuko rundanyad, gadikye va uja divlanir, aze va diremuko vukiso kabdue intafa mona az griawiso wir. Dimlanison, va ironokikya erur nume mbi dulzer :

— Kle va kotcoba gonowelidá !

Ina va bruxa divplekur. Bruxa mo sid ins luber nume vanpir sersikye. Vanion, sin zo kured.

Va kulupafa kurera al tcoké, va vor kevtrapus va nyoxa vols grisiputesis al ulí. Gu opaf gom al zo divatcetaká ise al zo rotaskipedá ; azon gu semayana kita al zo tiobalé : « Tetce, fanik, batlizu bulul aze mea zo witil ‼»

  Xanto  
Vergumvelt Пёрышко Финиста ясна сокола
Rwaltreizak Народные русские сказки
Sutesik ayoltik
Piskura Александр Николаевич Афанасьев
Ava Rossiava
Evla 1855-1871
  Kalkotavara  
Vergumvelt Bruxa ke Finist Oklaflaweza
Kalkotavasik Damien Etcheverry
Piskura
Evla 2014
Klita
  Krentduga  
Webesik Troubadour
Krentduga Image:100%.jpg Tuenayana

Yunkeks ke Ivan Bilibin
Yunkeks ke Ivan Bilibin


   
   

Народные русские сказки (Rwaltreiz ke Rossia)