Bresitol is idatcol

Teliz mal Wikikrenteem.

Grablé kal exulera, aneyara

Bresitol is idatcol
Mongolafa vunda


Lekepon bresitol is idatcol beron belcon bliyid. Konviele aneyason va sinka, moe alizmonikafa kelda va eyelt dem fest ve trasiyid. Milton fuxetolon vaon ve djupakayad.

Vexe bresitol ve kaliyir :

- Ede va fest batlize co-estut, ayik co-pitid. Va mevtavapa tidlanit aze banlize vaon estut.

- Batinde askit ! Vexe tokkane va fest co-goburet ? idatcol ve eruyur.

- Tokkane va fest fu buret ? bresitol ve kaliyir. Kontol moe ge vaon gobureter. Vexe cepitera tir olgafa kobara.

- Kiewafa, moe ge va fest buré. Rin, nuvelel cepitesik, narison va fest mo ge idatcol puon kalion ve kaliyir. Bresitol ve fineyer, va gariza ve fenkupuyur aze va idatcol cepitepeson toz radimelaniyir.

Viele sin va mevtava tidlaniyid, bresitol ve kaliyir :

- Pakara va fest co-tir mefavlafa. Kontol vaon varon co-gonestur.

- Voxe toktol co-godir ? idatcol ve kaliyir.

Bresitol ve kaliyir :

- Tel losavsaf kontol riwer da estur. Toka tir rinafa klaa ?

Djumortason va bresitol ta seotara va fest tori antaf int, idatcol ve kaliyir :

- Viele tiyí jotaf, Sumber mevtava anton tiyir venta ise Vrod Bira warulla.

Kreme da bresitol va batyona pulva ve gildeyer ve boregayar. Idatcol ve foliyir da ixam va fest al wayar. Nubapon ve eruyur :

- Tokdume borel ?

- Va baroy bresitoloc dí ! bresitol ve kaliyir. Tele jinafe nasbeikye tir mon milklaafe gu rin. Batcoba va jin konteper.

Viele idatcol va batcoba ve gildeyer, ve tiyir kinokaf gu int. Aelepes is uvoonelnies ve dimdenlaniyir. Remion bresitol kali griaelara va varaf fest estuyur.

  Xanto  
Vergumvelt Le renard et le loup
Sutesik -
Piskura -
Ava Mongolava
Evla -
  Kalkotavara  
Vergumvelt Bresitol is idatcol
Kalkotavasik Sabrina Benkelloun
Piskura -
Evla 2007
  Krentduga  
Webesik Sab
Krentduga Image:75%.jpg Gotuenana