Boris Pasternak

Teliz mal Wikikrenteem.

Grablé kal exulera, aneyara
Boris Pasternak

1890-1960
Rossiavaf suterotik

 Nobel Suterotafo Poradro : 1958

Борис Леонидович Пастернак (rossiavon).

Sovietaf rossiaf suterotik. Koblira ba 10/02/1890 koe Moskva, awalkera ba 30/05/1960 koe Peredelkino poke Moskva.

Nazbeik ke lingesikye is lexusikya, va trakopa koe Moskva kotla (1902-1911) az Marburg koe Germana (1912) az tolon Moskva (1915) vayayar. Nekev donafa trakopafa ravera, va trakopa di ebgayar dum va lexa abdion al ebgayar, torion wori inaf tavesik tiyir Skriabin kotgrupaf lexasik, aze va ezlopa di en koaskiyir. Taneafa ezlaxa koe guazut bak 1913 zo sanegayad. Moion bak 1914 Близнец в тучах44 (Jelik koe rujodxo) taneafa larma va inafa fitctanuskuca razduyur. Ezla ke taneafa koe Поверх барьеров (Vamoe lirkeem) ko toleafa larma bak 1917 di zo lokon tolnarayad.

Batsareon, Pasternak va rossiaf enidevikeem (Tsentrifuga lospa) is Mayakovski tel lofitckiraf pokefiyir. Battel zavzatar tan abdualban ezlopik vols tan rietovaf nik. Dokobason do yon enidevik, Pasternak va sinafa plabuca varze pulukafa araya me naleyer ; artion, va seramuca ke Mayakovski icde artowarafa tizuca dere me naleyer. Sanegara va Сестра моя – жизнь (Jinaf berik bli) bak 1922 pu Pasternak va taneafa ema koe patectaf suteroteem ravalduyur.

Inafa ezlopa al zo reduyur ise yamba va inafa lukruca al tuacayar. Batcoba tir givanyasa oye da ezlaxa ke neva va 1917 evlayad. Pasternak va evlavoda sonkeyer ; vexe sedme in, ropplekuwera ke koefa tamava kan xefto ke skewera is ropplekura va tuwavamilbava gan zivotc en tiyid lozolonafa dam seltafa artowara. Koe Yona watsa is amidaca (1923) klita ke larma di zo gruyeyer. Vexe mana artowara wori me tiyir rofrayena gan Pasternak : lezolonafa dam Сестра моя – жизнь wori tiyir ironokafa pokolesaca ke witaf ayikeem. Bat envaks gan Pasternak zo muxayar koe alaakafa ezla icde Taneafa Rossiafa Artowara (tela bak 1905) : Девятьсот пятый год (1905 tanda) (1926) az Лейтенант Шмидт (Cmidt rikulik) (1927). Visokaya Bolezn (Akolapa) (1928) ara ezla va Lyenin is sare zo ektuyur.

Bat "latrarugal" tenuweyer ba Toleafa koblira larma (1932) tcalasa va betara va listucopa. Pasternak yotcar da vol zo vangruper gan suterotontinikeem. Taneafa ezla ke bata neva pu Buxarin zo tarizayar. Koe munesteks va Taneafa Aba ke Sovietevaf Suterotikeem (1934), battan va Pasternak wetce tan saref lokiewaf suterotik al tualiayar. Pakon batdume azon Pasternak va int ve lanyayar da stivapaweyer ; bak 1930 sanda va ezlaf remsuteks va yon germanaf is francaf is englaf is sakartvelaf suterotik anton sanegayar ; vanmiae kalrossiavaf battan tid Goethe is Shakespeare is Shelley is Keats is Verlaine is Slovacki is Petőfi is Orbeliani is Pacavela. Toloya warzafa nyabafa larma bak geja zo sanegayad : На ранних поездах (Koe impadimak ke vanafiz) (1943) is Земной простор (Tawavafa darka) (1945). Aze kaiki geja toloya doca : Stikixi iz romana (Yona ezla mal berpot) (1954) is Kogda vraz s Gulyatsa (Viele kieweter) (1956). Miv zavzason Pasternak al betawer : turingawer ise tuaftawer ise tuproyawer ; al videyer va famuca gu kontuca dem "nyabaf pwadesik", dana askir da sutesik pu suka ik miel ik muva ik imwa fereon pulvisker ise da mea tir ezlopik pulvis icde tuwava vexe tuwava pulvisa icde int is pu pasus ezlopik.

Pasternak wavepon toz veduyur. Bak 1922 Destvo Luvers (Rumeugal ke Luvers) berpotam az bak 1924 Yona severofa joya nega az bak 1931 Kookerelesiki al zo sanegayad. Wori sutesik krupteyer da Doktor Jivago (Jivago Selaropik) (1945-1956) berpot tiyir nelkaf suterot, tel skuks. Kalpouyun koe SSSR golde da kevartowaracan, bak 1957 koe Italia berpot zo sanegayar aze zo malrossiavayar kal jontika ava viele bak 1958 Pasternak va Nobel Poradro seotayar. Moi sanegara koe SSSR wetce nyukik is toidesik Pasternak zo askiper ise kou Cultim dem Suterotikeem zo divlapuyur aze askiyir da in va Poradro ve ebgayar. Mana plabaca va berpotcek vol maletiyir : telyon nixeas va sutesik koe feleem is bak winugaf katanareem vaon al me beliyid !

Pasternak al ebleyer da va walvedeyafa pomara isu nendara kucilayar ; batcoba stapeyer enide wetce volnik ke sovietevafa selteva zo krupteyer.

Arti tanda Pasternak awalkeyer.


Boris Pasternak

Boris Pasternak
 Blira 1890-1960
 Ava Rossiava
 Suterind Ezlopa, Berpot
  Suterot

  • Близнец в тучах (1914) - Jelik koe rujodxo
  • Поверх барьеров (1917) - Vamoe lirkeem
  • Сестра моя — жизнь (1922) - Jinaf berik bli
  • Destvo Luvers (1922) - Rumeugal ke Luvers
  • Yona watsa isu amidaca (1923)
  • Девятьсот пятый год (1927) - 1905 tanda
  • Лейтенант Шмидт (1927) - Cmidt rikulik
  • Visokaya Bolezn (1928) - Akolapa
  • Toleafa koblira (1932)
  • На ранних поездах (1943) - Koe impadimak ke vanafiz
  • Земной простор (1945) - Tawavafa darka
  • Stikixi iz romana (1954) - Yona ezla mal berpot
  • Kogda vraz s Gulyatsa (1956) - Viele kieweter
  • Доктор Живаго (1958) - Jivago selaropik