Biblia Nasbal Blokey06

Teliz mal Wikikrenteem.

Grablé kal exulera, aneyara

Kristevafa Biblia : Guazafa Bafela


Nasbal neva, teveaf blokey : Avonanuca ke ayikeem

  1. Viele moe tawava ayikeem va int toz jonkayar ise nasbeikya al nasbalayad,
  2. Nasbeikye ke Lorik wid da nasbeikya ke ayik tiyid listafa, nume vanmiau konaka sinon kiblana vaon yerumayad.
  3. Bam Felialorik ve kaliyir : « Jinafa swava koe ayik me parmon zavzatar kire ayik anton tir cot ise intaf vieleem titir decem-tol-sanda ».
  4. Batugale moe tawava gulik tiyid, moi da nasbeikye ke Lorik van yona nasbeikya ke ayik al piyid nume sinya va yon nasbeik pu sinye al ziliyid : bak savsugal bat gradilik di tiyid vartaf.
  5. Felialorik ve wiyir da ikoruca ke ayik moe tawava tiyir gijapafa ise kota trakura ke inafa takra va rotuca kotvielon tanon vanayar.
  6. Felialorik ve ireglieyer da va ayik moe tawava al reduyur, nume intafa takra ve zo vanmanhayar.
  7. Nume Felialorik ve kaliyir : « Moe tawava va jinon reduyun ayik awalkopeté, male ayik kale bonol is perake is keltsveri ; kire ireglié da va sin al redú ! »
  8. Vexe Noe gan Felialorik ve zo kaydeyer.
  9. Tir veynasbeikeem ke Noe : Noe tiyir malhik is jabudik bak intafe sare ; Noe do Lorik laniyir.
  10. Noe va baroye nasbeikye ve nasbayar : va Sem is Cham is Iapheth.
  11. Sedme Lorik tawava tiyir avonanafa, tawava tiyir dem jontika tizuca.
  12. Lorik va tawava ve disukeyer, ise in tiyir avonanafa ; kire kot cot va intafa joya moe tawava al avonayar.
  13. Bam Lorik pu Noe ve kaliyir : « Tena ke kot cot gan jin zo azavzar ; kire sin dem tizuca va tawava al tukotrad ; acum, va sin is tawava fu vilá ! »
  14. Va kotarn kum djokaalinta ial ; va bat kotarn bridon rabandetel ise kan violt keveon is kakeon storlatal.
  15. Batinde askitil : kotarn titir abrotcaf gu bar-decemoy ladavacek is mantaf gu alub-sanoy is ontinaf gu bar-sanoy.
  16. Koe kotarn va dilk ontinaf gu tanoy ladavacek askitil ; vakrile kotarn va tuvel exonetel ; ise va vlevef vegem isu toleaf isu bareaf vegedutul.
  17. Luxe jin, enide kot blis cot leve kelt zo vilar tit tawava va lavasoist fu koimpá ; kotcoba moe tawava xonukatar.
  18. Vexe do rin va kogluyara exoné ! rin is nasbeikyeeem is yerumanikya is kota nasbeikafa yerumanikya, va kotarn kolanitic !
  19. Ke kot blisikeem, ke kot cot, askitil da toloy blisik ke kota katca va kotarn kolanir, nume sin do rin blison zo videted : ayedikye is ayedikya titid.
  20. Va sveri kare inafa katca is bonol kare katca is perake kare kota katca ke tawava, sotre toloy ke kota katca, do rin pitid enide va sinafi bli videl.
  21. Ise rin, va abickot rotestun blot aze poke int vaon eksal enide batcoba mu rin is dere sin va sinka zanudatar. »
  22. Noe batinde askiyir : va kotcoba dirgayana gan Lorik skuyur.

  Xanto  
Vergumvelt Biblia, Vetus testamentum
Sutesik Katalikafa Uja
Piskura Nova Vulgata siatos
Ava Latinava
Evla
  Kalkotavara  
Vergumvelt Biblia, Guazafa Bafela
Kalkotavasik Mixail Kostov
Piskura -
Evla 2002/2008
  Krentduga  
Webesik Troubadour
Krentduga Image:Compare.jpg Tuenayana


Kristevafa Biblia : Guazafa Bafela

Nasbal neva

← 5-eaf blokey : Veynasbeikeem ke Adam - 6-eaf blokey - 7-eaf blokey : Vamolavara  →

Ara ava se