Biblia Nasbal Blokey04

Teliz mal Wikikrenteem.

Grablé kal exulera, aneyara

Kristevafa Biblia : Guazafa Bafela


Nasbal neva, balemeaf blokey : Cain is Abel

  1. Adam va Eva kurenik ve grupeyer ; in va Cain ve envayar aze ve nasbayar aze ve kaliyir : « Kan Felialorik va ayik al tazuká ».
  2. Va Abel berikye ware ve nasbayar. Abel di tiyir namulolsusik voxe Cain ziasik.
  3. Arti kon ugal, Cain va yon tawilt pu Felialorik ve bundayar ;
  4. ise Abel, luxeon, va yon intaf taneon koblis namuloloc is sinaf sum ve bundayar. Felialorik va Abel is inaf bundaks kuvon ve disukeyer ;
  5. voxe va Cain is inaf bundaks kuvon me ve disukeyer. Cain ve zo lemistepeyer nume gexata tiyir balienafa.
  6. Ise Felialorik pu Cain ve kaliyir : « Tokdume zo lemistel ise rinafa gexata tir balienafa ?
  7. Lanon, ede teginhil, va gexata kamadatal, voxe ede tegijil, troba kabdu tuvel senhar ise inaf jugemereem van rin tir : vexe rin, va in felil ! »
  8. Wori, Cain pu Abel berik ve pulviyir ; vexe tison koe taya, Cain va Abel berik ve ipeyer aze ve atayar.
  9. Felialorik pu Cain ve kaliyir : «  Toklize Abel rinaf berik tir ? » In ve dulzeyer : « Me grupé. Kas susik ke jinaf berik tí ? »
  10. Aze Felialorik ve kaliyir : « Va tokcoba al askil ? Puda ke fortey ke rinaf berik mal tawa kal jin ier.
  11. Batvielu, mal taya artfenkuyusa ta kazawara va fortey ke rinaf berik kan rinafa nuba zo rotapstatal.
  12. Viele va sid midutul, kuluca pu rin mea zo zilitir. Titil krabesik is gondulesik moo tawava ».
  13. Cain pu Felilorik ve kaliyir : « Tiga tir gijarsafa gu levburera.
  14. Batse, rin div bat taway va jin dure aloyal ; nume sume rinaf lesay va int preyutatá, tití krabesik is gondulesik moo tawava, nume bettan va jin trasitir atatar ».
  15. Felialorik pu in ve kaliyir : « Ede kontan va Cain co-atatar, Cain peron zo co-jaxadatar ! » Nume Felialorik va Cain ve tcalayar enide bettan va in trasis me atar.
  16. Azon, Cain va lesay ke Felialorik ve illaniyir aze ko Nod patecta roneon Eden di irubayar.
  17. Cain va kurenikya ve grupeyer ; in va Henoch ve envayar ise ve nasbayar. Azon in va widava kolnayar ise kan Henoch nasbeikye ve yoltayar.
  18. Henoch va Irad ve nasbayar, aze Irad va Maviael ve nasbayar, aze Maviael va Mathusael ve nasbayar, aze Mathusael va Lamech ve nasbayar.
  19. Lamech va toloya kurenikya ve nariyir : yolt ke taneafa tiyir Ada ise yolt ke ara Sella.
  20. Ada va Iabel ve nasbayar : di tiyir gadikye de telyon irubas leve broca poke milkava.
  21. Yolt ke inafe berikye tiyir Iubal : in di tiyir gadik ke kottan fwakus is noyus.
  22. Luxe Sella, in va Tubalcain ve nasbayar, dan va kota iyekotxa isu azilxa glotcayar. Berikya ke Tubalcain tiyir Noema.
  23. Lamech pu kurenikeem ve kaliyir :
    « Ada is Sella, va jinafa puda kalterektac !
    Kurenikeem ke Lamech, va jinafa pulva terektac !
    Golde jinaf bakaks va ayik
    is golde jinaf wanieks va yik al atá !
  24. Cain peron zo jaxadatar,
    voxe Lamech persanperon ».
  25. Adam va kurenikya ware ve grupeyer ; in va nasbeikye ve nasbayar aze va in kan Seth ve yoltayar, kalison : « Felialorik va are nasbeikye ika Abel atayan gan Cain pu jin al zilir ».
  26. Seth va nasbeikye dere ve diyir, va in kan Enos ve yoltayar. Batvielu yolt ke Felialorik toz zo korozayar.

  Xanto  
Vergumvelt Biblia, Vetus testamentum
Sutesik Katalikafa Uja
Piskura Nova Vulgata siatos
Ava Latinava
Evla
  Kalkotavara  
Vergumvelt Biblia, Guazafa Bafela
Kalkotavasik Mixail Kostov
Piskura -
Evla 2002/2008
  Krentduga  
Webesik Troubadour
Krentduga Image:Compare.jpg Tuenayana


Kristevafa Biblia : Guazafa Bafela

Nasbal neva

← 3-eaf blokey : Lubera - 4-eaf blokey - 5-eaf blokey : Veynasbeikeem ke Adam  →

Ara ava se