Biblia Nasbal Blokey03

Teliz mal Wikikrenteem.

Grablé kal exulera, aneyara

Kristevafa Biblia : Guazafa Bafela


Nasbal neva, bareaf blokey : Lubera

  1. Perake tiyir tel lovepokaf tayasulem askiyin gan Felialorik. Pu ayikya ve kaliyir : « Kas Lorik en kaliyir da win va kot aal ke matela me estutuc ? »
  2. Ayikya pu perake ve dulzeyer : « Cin va ilt ke yon aal ke matela estuv.
  3. Voxe icde ilt ke aal iste matela, Lorik al kalir : Win me estutuc ise me uzatac kivoe da co-awalkec.
  4. Bam perake pu ayikya ve kaliyir : Win me awalketec ;
  5. Vexe Lorik gruper da, viele win vaon estutuc itafenkutuc, ise titic dum lorik grupes va kiewuca is rotuca.
  6. Ayikya ve wiyir da aal tiyir kiewaf gu estura is plinaf gu wira, ise da tiyir tciamaf ta fenkura va gruuca ; in va iltki ve nariyir ; pu kurenik poke in dere vaon ve ziliyir nume vaon ve estuyur.
  7. Iteem ke kottel ve fenkuyuwer. Sin ve grupeyed da tiyid lebaf, ise asadayas va yona agzonaaltoa, va yona anamba ve iayad.
  8. Bam sin va puda ke Felialorik, exules va matela moni siel, ve gildeyed, nume Adam is kurenik sume gexata ke Felialorik vanmiae aaleem ke matela va int ve preyutayad.
  9. Vexe Felialorik va Adam ve rozayar aze ve kaliyir : « Toklize til ? »
  10. In ve dulzeyer : « Va rinafa puda koe matela al gildé, voxe al vudé kire tí lebaf nume va int al preyutá ».
  11. Aze Felialorik ve kaliyir : « Toktan pu rin al tavé da til lebaf ? Kas va ilt ke aal jinon biuyun al estul ? »
  12. Adam ve dulzeyer : « Ayikya poke jin rinon rundayana va ilt ke aal pu jin al zilí nume al estú ».
  13. Aze Felialorik pu ayikya ve kaliyir : « Tokdume va batcoba al askil ? » In ve dulzeyer : « Perake va jin al brostar nume vaon al estú ».
  14. Felialorik pu perake ve kaliyir : « Larde va batcoba al askil,
    Vanmiae bonoleem zo sorotapstatal
    is vanmiae kotraf tayasulemeem.
    Moe jivot soterigetel nume va gopa sokestutul
    kotvielon bak blira.
  15. Wal rin is ayikya va volnuca plekutú,
    wal rinaf volnasbeikeem isu inaf :
    inya va rinafa taka selutur,
    voxe va inafu buu bakatal ».
  16. In pu ayikya ve kaliyir :
    « Va rinaf genasbalareem tulomejesatá,
    kranavon sonasbatal,
    ise rinaf jugemereem van kurenik sotitir,
    voxe in va rin sofelitir ».
  17. In pu Adam ve kaliyir : « Larde va puda ke kurenik al kevterektá nume al estul va ilt ke aal, icde dan al benplekuyú da me gonestul,
    golde rin sid zo sorotapstatar.
    Tre kuncara va sinka warzetel
    kotvielon bak blira.
  18. In mu rin va yona toresta isu indiva warzeter ise va tayawerd estutul.
  19. Moe lesay furoveson va beg rotestutul,
    vieli ko tawa dimpitil,
    lizu zo malnariyil ;
    kire til gopa nume ko gopa dimpitil ».
  20. Adam va kurenik kan Eva ve yoltayar, kire di titir gadikya ke blisikeem.
  21. Felialorik mu Adam is kurenik va yone almavage iayar aze va sin ve kavageyer.
  22. Ise Felialorik ve kaliyir : « Batinde, ayik daletoe tir dum min, icde grupera va kiewuca is rotuca. Dure weyonat da in nubasotcer ise va bliaal narir ise vaon estur ise kotabon blir ! »
  23. Nume Felialorik div Eden matela va in ve aloyayar enide in va tawa midur lizu zo malnariyir.
  24. Batinde in va Adam ve aloyayar ; ise talte Eden matela va yon cherubim susik tegulas va teykas dug ta kevsura va bliaal, ve rundayar.

  Xanto  
Vergumvelt Biblia, Vetus testamentum
Sutesik Katalikafa Uja
Piskura Nova Vulgata siatos
Ava Latinava
Evla
  Kalkotavara  
Vergumvelt Biblia, Guazafa Bafela
Kalkotavasik Mixail Kostov
Piskura -
Evla 2002/2008
  Krentduga  
Webesik Troubadour
Krentduga Image:Compare.jpg Tuenayana


Kristevafa Biblia : Guazafa Bafela

Nasbal neva

← 2-eaf blokey : Fuda - 3-eaf blokey - 4-eaf blokey : Cain is Abel  →

Ara ava se