Biblia Nasbal Blokey02

Teliz mal Wikikrenteem.

Grablé kal exulera, aneyara

Kristevafa Biblia : Guazafa Bafela


Nasbal neva, toleaf blokey : Fuda

  1. Batinde kelt is tawava is sinafa kotrafa ervolia zo tenukeyed.
  2. Ba pereaf viel Lorik va skuyun grabom ve tenukeyer : nume ba pereaf viel ke skuyun grabom va int tildeyer.
  3. Lorik va pereaf viel ve kumziliyir ise ve tutumtayar kire bak bat viel golde kotraf reduyun grabom va int tildeyer.
  4. Tid xanta ke kelt is tawava viele ve zo reduyud.
  5. Viele Felialorik va tawava is kelt ve askiyir, mek aalam isu tayawerd ixam welkeyed : kire Felialorik men al askiyir da muvar mo tawava, ise mek ayik ta tawamidura tiyir.
  6. Vexe klita ve divsidaweyer rustoleson va kotrafa sidwelma.
  7. Felialorik kan tawagoa va ayik ve tazukayar, ko pezolk va bligael ve sukeyer nume ayik ve vanpiyir blisik.
  8. Azon Felialorik koe Eden va fudamatela roneon ve kotaplekuyur aze tazukayan ayik ve rundayar.
  9. Felialorik mal sid va kota aalinda, agralafa gu wira is kiewafa gu estura, is bliaal iste matela, is gruperaal dem kiewuca is rotuca tuatrisayar.
  10. Bost va Eden divayar ise va fudamatela rustoleyer aze balemnarilton solzarteweyer.
  11. Yolt ke taneaf narilt tir Phison ; tir tel anamoas va Hevila patecta lize moava tir.
  12. Moava ke bata patecta tir karafa ; dere tid bdellium aka is eviba.
  13. Yolt ke toleaf bost tir Geon ; tir tel anamoas va kotrafa Ityopia patecta.
  14. Yolt ke bareaf bost tir Tigris ; tir tel ronoas va Assyria patecta. Balemeaf bost tir Euphrates.
  15. Felialorik va ayik ve nariyir aze ko Eden fudamatela ta midura is sura ve rundayar.
  16. Felialorik pu ayik ve benplekuyur : « Va kot aal ke matela rotestutul ;
  17. vols gruperaal dem kiewuca is rotuca, kire ede rin co-estul nume co-awalkel ».
  18. Felialorik ve kaliyir : « Mekiewafa da ayik tir antaf ; va pomasik nuxaf gu in muon askití ».
  19. Felialorik kan tawa va kot tayasulem is koti keltsveri ve tazukayar aze van ayik va sin ve rozayar ta da wir inde in vaon yoltatar nume enide kot blisik va yolt ziliyin gan ayik bureter.
  20. Nume Adam va kot bonol isu keltsveri isu tayasulem ve yoltayar ; voxe in tori Adam va mek nuxaf pomasik ve trasiyir.
  21. Bam Felialorik va Adam ve kokenibepeyer. Dan ve komodeyer ; in va tanoya krimba ve solimpayar aze va cot ikaon ve dimbudeyer.
  22. Felialorik kan krimba tiolteyena bas Adam va ayikya ve tazukayar aze van Adam ve stayar.
  23. Aze Adam ve kaliyir :
    « Batse dure niska bas jinaf niskeem
    is cot bas jinaf cot !
    Kan ayikya soyoltatá,
    Kire in bas ayik al zo askir ».
  24. Batdume ayikye va gadikeem bulutur aze va kurenikya suveter nume yontol va tanoy cot vanpitid.
  25. Adam is kurenikya tiyid lebaf vols kinokaf.

  Xanto  
Vergumvelt Biblia, Vetus testamentum
Sutesik Katalikafa Uja
Piskura Nova Vulgata siatos
Ava Latinava
Evla
  Kalkotavara  
Vergumvelt Biblia, Guazafa Bafela
Kalkotavasik Mixail Kostov
Piskura -
Evla 2002/2008
  Krentduga  
Webesik Troubadour
Krentduga Image:Compare.jpg Tuenayana


Kristevafa Biblia : Guazafa Bafela

Nasbal neva

← 1-eaf blokey : Redura - 2-eaf blokey - 3-eaf blokey : Lubera  →

Ara ava se