Biblia Nasbal Blokey01

Teliz mal Wikikrenteem.

Grablé kal exulera, aneyara

Kristevafa Biblia : Guazafa Bafela


Nasbal neva, taneaf blokey : Redura

  1. Tozion, Lorik va kelt is tawava reduyur.
  2. Tawava tiyir metazukafa is vlardafa : mielak welmon ice bup tiyir, ise swava ke Lorik va lava vamooayar.
  3. Lorik ve kaliyir : « Afi tir ! Nume afi ve tiyir ».
  4. Lorik wiyir da afi tinhiyir ; nume Lorik va afi sol mielak ve solparsayar.
  5. Lorik va afi kan afiz is miel kan mielak ve yoltayar. Batinde, siel sotir ise gazda sotir : ve tiyir tel taneaf viel.
  6. Lorik ve kaliyir : « Wale laveem divatce tir nume lava sol lava zo solparsar ! »
  7. Nume Lorik va divatce ve askiyir nume vlevefa lava sol vamoefa lava ve solparsayar. Batinde ve tiyir.
  8. Lorik va divatce kan kelt ve yoltayar. Batinde siel sotir ise gazda sotir : tel toleaf viel ve tiyir.
  9. Lorik ve kaliyir : « Laveem vleve kelt ko tanoyo xo va int belcar nume rode awir ! » Batinde ve tiyir.
  10. Lorik va rode wetce tawava is laveem wetce bira ve yoltayar. Lorik ve wiyir da batcoba tiyir kiewafa.
  11. Azon Lorik ve kaliyir : « Va ruxa is faytaweyaf werd is yon grunasbalkes amidaf iltaal tawa warzer ! » Batinde ve tiyir.
  12. Tawa va ruxa is faytaweyaf werd is yon grunasbalkes amidaf iltaal sowarzer. Lorik ve wiyir da batcoba tiyir kiewafa.
  13. Batinde siel sotir ise gazda sotir : tel bareaf viel ve tiyir.
  14. Lorik ve kaliyir : « Ta solparsara va afiz sol miel koe keltxo afiak tid ! tis sugda solparsasa va kote sare isu viel isu ilana ;
  15. zanudasa va afiak koe keltxo ta koafira va tawava ». Batinde ve tiyir.
  16. Lorik va toloy afiakap ve askiyir, va tel logijaf ta afizara is tel lopinaf ta mielara ; va bitejeem dere ve askiyir.
  17. Lorik ko keltxo ta koafira va tawava vaon ve rundayar,
  18. ta mielara is afizara, is ta solparsara va afi sol mielak. Lorik ve wiyir da batcoba tiyir kiewafa.
  19. Batinde siel sotir ise gazda sotir : tel balemeaf viel ve tiyir.
  20. Lorik ve kaliyir : « Lava va blis sulem aultoveson warzer ise sveri vamoe tawava va kelt vantalar ! »
  21. Va aultoveson sowarzen gan laveem va kot liziwes blis kabay isu sulem Lorik reduyur ; va koti amidafi wiltkirafi sveri dere reduyur. Lorik ve wiyir da batcoba tiyir kiewafa.
  22. Lorik vaon ve kumziliyir, kalison : « Tic nasbukaf, jonkac nume va biralaveem tukotrac !; ise moe tawava sveri va sint jonkac ! »
  23. Batinde siel sotir ise gazda sotir : tel alubeaf viel ve tiyir.
  24. Lorik ve kaliyir : « Tawava va amidaf blis sulem isu bonol isu perakedunol isu tawavasulem warzer ! » Nume batinde ve tiyir.
  25. Lorik va tawavasulem is bonol is kot perakedunol amidon askiyir. Lorik ve wiyir da batcoba tiyir kiewafa.
  26. Azon, Lorik ve kaliyir : « Kare intafa ewava isu vektasuca va ayik askí ! nume in va birakabay is keltsveri is bonol is kotafa tawava is kot teriges perakedunol felir ! »
  27. Lorik kare intafa ewava va ayik reduyur,
    kare ewava ke Lorik vaon reduyur
    va ayikye is ayikya reduyur.
  28. Lorik va sin ve kumziliyir aze ve kaliyir : « Tic nasbukaf, jonkac nume va tawava tukotrac ise vaon sedec ! Ise va birakabay is keltsveri is kot sulem moolanis va tawava felic ! »
  29. Aze Lorik ve kaliyir : « Batse, va kot faytaweykiraf werd tis moe varafa tawava, is va kot iltkiraf is faytaweykiraf aal pu rin zilí : batcoba sotitir winafa sinka.
  30. Ise pu kot tawavasulem isu keltsveri is kot moolanis plek miv dis va blisukera kare sinka va kot musaf werd zilí ». Nume batinde ve tiyir.
  31. Lorik ve wiyir da askiyina kotcoba nume tiyir kiewapafa. Batinde siel sotir ise gazda sotir : tel teveaf viel ve tiyir.

  Xanto  
Vergumvelt Biblia, Vetus testamentum
Sutesik Katalikafa Uja
Piskura Nova Vulgata siatos
Ava Latinava
Evla
  Kalkotavara  
Vergumvelt Biblia, Guazafa Bafela
Kalkotavasik Mixail Kostov
Piskura -
Evla 2002/2008
  Krentduga  
Webesik Troubadour
Krentduga Image:Compare.jpg Tuenanaya


Kristevafa Biblia : Guazafa Bafela

Nasbal neva

← — - 1-eaf blokey - 2-eaf blokey : Fuda  →

Ara ava se