Biblia Koxelet Blokey09

Teliz mal Wikikrenteem.

Grablé kal exulera, aneyara

Kristevafa Biblia : Guazafa Bafela


Koxelet neva, lerdeaf blokey

  1. En, ta bata kotcoba jin va takra al rewá, kan batcoba al rindé nume al wí da malhik is proyik is sinaf kobareem tid koe nuba ke Lorik,
    is renara lidam bogara ;
    ayik va mecoba sogruper : kotcoba tir kabdueon.
  2. Kotcoba tori kottan dere sosokir ;
    mili bali tori malhik is ikorik,
    tori karaf vonik
    is volkarik,
    tori wetasik is mewetasik ;
    dere tir tori kiewik is trobasik,
    tori vogadasik lidam vogadarakivasik.
  3. Batcoba tir rotaca vanmiae kota sokira leve awalt kire bali tori kottan milinde tir ;
    acum takra ke ayikoc tir ikorapafa ise oviskuca koe takra bak inafa blira tir ;
    kaikion in va awalkikeem sodenar. Kire, toktan zo divzawar ?
  4. Mu kot blisik pokolera tir ;
    ise dace blis vakol loon vodar dam awalkaf krapol.
  5. Keskeon, blisik sogruper da sokawalketer ;
    voxe awalkik va mecoba sogruper nume mu in mea kuba tir larde setikera va in tir vulkunafa.
  6. Ise intafa renara isu bogara isu djumera ixam al xonukad ;
    ise konviele va kon pak ke sokine leve awalt mea seotatad.
  7. Lanil, va rinaf beg daavon estul,
    ise va rinafa centaxa kolukon ulil ;
    kire Lorik va rinaf askiks malipon puvegur.
  8. Rinafe vage kotoulon tir batakafe,
    ise punta moe taka me gracer !
  9. Va blira do renanikya pojal,
    bak kot viel ke rinafa greciafa blira, zilin leve awalt gan Lorik,
    bak kot viel ke rinafa greciuca ;
    kire rinaf pak koe blira tir,
    vanmiae rinafa kobara leve awalt.
  10. Va kotcoba rotaskina kan rinafa nuba isu po askil !
    kire mek grabom isu trak isu opa isu proyuca tid,
    koe jonvielexo ke awalkik, liz lanil.
  11. Leve awalt dere al wí
    da vultera me tir ke tuzik meie geja tir ke laspedik,
    meie beg ke proyik,
    meie koluca ke gruik,
    meie gunt ke grupeik ;
    kire kotcoba mu sin va ugal is goaspileem rupter.
  12. Ayik va ironokaf bartiv dere me gruper,
    nuxaf gu balion kodonan kabay,
    is koikseni sveri ;
    milinde kot ayikoc ben volkalucugal zo cualar,
    viele bat laizon moon luber.
  13. Jin leve awalt va bata adala ke proyuca jinon nuvelayasa gijafa dere al wí.
  14. Widavama dem abice ayikye tiyir ;
    gijarotif gazik kevon avlayar aze ve zonesteyer aze va folkap yo kevon kolnayar.
  15. Wawaf is proyaf ayik tiyir. Tuke proyuca ve giwayar. Voxe metan va bat wawik al setikeyer.
  16. Aze al kalí :
    Proyuca lodam po.
    Wori proyuca ke wawik zo vligur,
    ise intafa pulva me zo terktar.
  17. Pulva ke proyik aulon terktana lodam ie ke tel lovolpeztorik vodar.
  18. Proyuca lodam gejusiki vodar ;
    vexe tanoy trobasik sovilapar.

  Xanto  
Vergumvelt Biblia, Vetus testamentum
Sutesik Katalikafa Uja
Piskura Vulgate siatos
Ava Latinava
Evla
  Kalkotavara  
Vergumvelt Biblia, Guazafa Bafela
Kalkotavasik Mixail Kostov
Piskura -
Evla 2001
  Krentduga  
Webesik Troubadour
Krentduga Image: 75%.jpg Gotuenana


Kristevafa Biblia : Guazafa Bafela

Koxelet neva

← Koxelet 8 - 9-eaf blokey - Koxelet 10  →

Ara ava se