Biblia Koxelet Blokey07

Teliz mal Wikikrenteem.

Grablé kal exulera, aneyara

Kristevafa Biblia : Guazafa Bafela


Koxelet neva, pereaf blokey

  1. Kotgrupucanha lodam kofigasikinhi,
    ise awalkeraviel lodam nasbalaraviel.
  2. Lanira ko sugawalkafa mona
    lodam tcunkerafa mona ;
    kire tir tena ke kottan,
    ise tel blis vaon dulaper.
  3. Nigera lodam kipera ;
    kire ton gabentafa gexata takra rotir valeafa.
  4. Takra ke proyik tir koe sugawalkafa mona,
    ise takra ke volpeztorik tir koe daavafa mona.
  5. Gildera va codara ke proyik
    lodam dankara ke volpeztorik.
  6. Kire dum lor ke torsta yo leve tuidulasiko,
    kipera ke volpeztorik tir bat.
    Dere tir greciaca.
  7. Ristara va proyik tuvolpeztorar,
    ise siabeks va takra avonar.
  8. Tena ke coba lodamu toza ;
    keik lodam calgik.
  9. Koe swava vol til noglotaf, kire noglotuca koe peztorik dayker.
  10. Me kalil : Toklizu pir tira da abdif viel se tiyid lokiewaf dam bat yo ? Kire va batcoba kan proyuca rin me erul.
  11. Proyuca lidam konolenaca,
    ise loon mu tan wis va awalt.
  12. Kire izgon gu proyuca tir brava dum izgon gu erba ;
    vexe gunt ke opa, tir da proyuca pu tan vaon digis va blira nover.
  13. Va grabom ke Lorik disukel : toktan va inafa tulivanaca rogrilivar ?
  14. Ba kalaf viel, til kalaf,
    voxe ba volkalaf viel, undel ! :
    Lorik va tol is artol al askir,
    ta da ayik kaiki int va titise meviele rokosmar.
  15. Remi jinaf greciaf vieleem va kotafa batcoba al wí.
    Tir man malhik xonukas koe malherot,
    ise tir man ikorik wan blis koe ikoruca.
  16. Me til malharsaf,
    ise me nuvelal proyarsaf :
    tokdume va int co-vilal ?
  17. Me til ikorarsaf,
    ise me til volpeztoraf :
    tokdume abdi evla co-awalkel ?
  18. Kiewafa da va batcoba namil ise va bancoba me frayel ;
    kire tan kivas va Lorik va kota batcoba divvawar.
  19. Proyuca askir da proyik tir lopof dam sanoy okilik ke widava.
  20. Me, moe Tawava mek malhaf dramgus vox meviele trobas ayik tir.
  21. Nume va kota kalina pulva me obral, kivoe da va rinaf zanisik rotapstas va rin co-rogildel ;
  22. kire rinafa takra jontikviele al peztaler da va artan miv al rotapstal.
  23. Kan proyuca va batcoba al satolé. Al kalí : tití proyaf. Ise proyuca sume jin al zavzar.
  24. Va sumee,
    va aludeve, va aludevepe, toktan rozomer ?
  25. Koe takra al yawá da va lazava ke coba yo grupé ise bralá ise aneyá ise va oviskuca ke ikoruca is akoyduca ke fituluca grupé.
  26. Ise lopirafa dam awalk tir ayikya
    ke dana takra tir ikse is dona,
    ise nubeem tir gluyasiki se ;
    tan tis plinaf gu Lorik vaon divvawar,
    volse trobasik ganon zo narir.
  27. Va batcoba al trasí, Koxelet kaliyir,
    rindeson tantanon va kota coba ta da va lazava konarí ;
  28. va batcoba jinafa gloga wan aneyá voxe men trasí.
    Vanmiau decitoye va tanoye ayikye al trasí ;
    volse vanmiau kot sin va meka ayikya al trasí.
  29. Anton, va batcoba al trasí,
    tir da Lorik va ronkaf ayik al askir ;
    vexe battan va jontik rimek al aneyar.

  Xanto  
Vergumvelt Biblia, Vetus testamentum
Sutesik Katalikafa Uja
Piskura Vulgate siatos
Ava Latinava
Evla
  Kalkotavara  
Vergumvelt Biblia, Guazafa Bafela
Kalkotavasik Mixail Kostov
Piskura -
Evla 2001
  Krentduga  
Webesik Troubadour
Krentduga Image: 75%.jpg Gotuenana


Kristevafa Biblia : Guazafa Bafela

Koxelet neva

← Koxelet 6 - 7-eaf blokey - Koxelet 8  →

Ara ava se