Biblia Koxelet Blokey05

Teliz mal Wikikrenteem.

Grablé kal exulera, aneyara

Kristevafa Biblia : Guazafa Bafela


Koxelet neva, alubeaf blokey

  1. Me keyul da artfenkur ise rinafa takra keyur da kabdue Lorik va pulva muxar ; kire Lorik koe kelt tir voxe rin moe tawava til : rinafa pulva se gotid abica !
  2. Kire, ede modovara se mal viunsuravraka koblid,
    puda ke volpeztorik askir da vanmiae pulvavraka zo gilder.
  3. Viele pu Lorik al fuxal, me gavel da skur, kire in va volpeztorik me albar : va rinafa fuxa skul !
  4. Tori rin, mefuxara lodam meskutuna fuxara tir.
  5. Me novel da rinaf art cottrobar ise lente staksenik me kalil da batcoba tir gariandaca. Tokdume Lorik gan rinafa pulva yo zo co-zuner ise va rinaf skuks co-vilar ?
  6. Kire ede vanmiae modovaravraka greciaca yo tid,
    dere koe pulvavraka tid jontika ;
    batdume, va Lorik kival !
  7. Ede koe winka va kimtaf ristanik is aksara va roka is malherot wil, me zo geval ; kire ontinapteyen tan va lodontinapteyen artan zo koeninter ise vamoe sin konaktan ware tid.
  8. Kotkerdelaf gunt mu patcta, tir giden gazik ke patcta.
  9. Erbafamik me erbon zo grisiputar, ise tan va kuluca albas me vaon impavantar. Dere tir greciaca.
  10. Viele kiewega aultover, estusik yo aultoved ; ise tok gunt mu intaf digisik tir vaxe da in miv wir ?
  11. Modera ke kobasik tir zijnafa, ede rotestuna abiccoba oku jontikcoba tid ; vexe griaelawera ke kulik me askir da in keniber.
  12. Tir astirbaf rotok jinon wiyin leve awalt : kulaca yo videna gan intaf digisik, askitina va inafa volkaluca.
  13. Bata kulaca yo golde kona mibaca griawid ; in va nasbeikye al nasbar nume mecoba koe inaf nubeem zavzar.
  14. Milinde in va jivot ke gadikya al divar, dimpir lebaf dum al piyir, ise ta kobara va koncoba ronarina kan tanoya nuba anton divburer.
  15. Ware tir astirbaf rotok. In malar dum al piyir ; ise tok gunt mu int da in mu suka al kobayar ?
  16. Ostik, bak kotrafa blira, in koe mielak estur, ise nigeper ise roteper ise zideper.
  17. Batse va coba al wí : ulira is estura is pojara va kiewati remi kotrafa kobara inon askina leve awalt bak vieleem ziliyin gan Lorik, mu ayik tid kiewafa koncoba ; kire tid inaf pak.
  18. Vexe, ede Lorik va kulaca yo is kiewega se pu ayik al zilir, ede al askir da in vaon rotestur ise paknarir ise remi kobara wiver, batcoba tir ziliks ke Lorik.
  19. Kire in va vieleem ke blira setikemeter kire Lorik va daava kotakrapar.

  Xanto  
Vergumvelt Biblia, Vetus testamentum
Sutesik Katalikafa Uja
Piskura Vulgate siatos
Ava Latinava
Evla
  Kalkotavara  
Vergumvelt Biblia, Guazafa Bafela
Kalkotavasik Mixail Kostov
Piskura -
Evla 2001
  Krentduga  
Webesik Troubadour
Krentduga Image: 75%.jpg Gotuenana


Kristevafa Biblia : Guazafa Bafela

Koxelet neva

← Koxelet 4 - 5-eaf blokey - Koxelet 6  →

Ara ava se