Biblia Koxelet Blokey02

Teliz mal Wikikrenteem.

Grablé kal exulera, aneyara

Kristevafa Biblia : Guazafa Bafela
  Xanto  
Vergumvelt Biblia, Vetus testamentum
Sutesik Katalikafa Uja
Piskura Vulgate siatos
Ava Latinava
Evla
  Kalkotavara  
Vergumvelt Biblia, Guazafa Bafela
Kalkotavasik Mixail Kostov
Piskura -
Evla 2001
  Krentduga  
Webesik Troubadour
Krentduga Image: 75%.jpg Gotuenana

Koxelet neva, toleaf blokey

  1. Koe takra al kalí : Tetce ! kan daava va rin posatá nume va kaluca grivutetel. Batse, ware tir greciaca.
  2. Icde kipera al kalí va : Volpeztorafa ! is icde daava : Va tokcoba zanudar ?
  3. Koe takra gorayá da va jinaf cot pu vor bildé, solve da jinafa takra va jin proyon co-statar, ise da va oviskuca mukotá kali da wí va tokcoba mu ayikoc leve kelt bak intafa blira tir kiewafa.
  4. Va grabomap yo skuyú : tori int va mona se kolnayá ; mu int va centaal yo taplekuyú ;
  5. mu int va matela yo is iltaalxo se askiyí, ise va jontika iltaalinda taplekuyú ;
  6. tori int va tourka se reduyú, ta rustolera va aalxo lize aal yo laumad.
  7. Va zanisikye se is zanisikya yo lusteyé, nume va sinaf nasbeik yo nasbalayas koe mona di diyí ; va jaftoleem se is namuloleem yo digiyí, loote dam bettan abdi jin koe Yerucalayim.
  8. Mu int va erba is moava is kulaca yo ke gazik is winka se flavayá. Pu int va dankasik yo is jontikote ayikya se, pluktaca ke ayikoc, tiskayá.
  9. Vanpiyí gijaf, logijaf dam bettan abdi jin koe Yerucalayim. Ise dace intafa proyuca do jin zavzatar.
  10. Kotcoba djumeyena gan jinaf iteem, me bason zelayá ; pu takra va meka daava vewayá ; kire jinafa takra va jinafa kobara puvegupuyur, ise tir pak yofteyen pu jin.
  11. Azon, va kot jinon skuyun grabom krafiayá, ise jinafa skusa puida ; voxe, kotcoba tir greciuca is sukonkara, ise mek gunt skun leve awalt tir.
  12. Bam van proyuca is fituluca is oviskuca va disukera askarayá. Kire, va tokcoba ayik radimiatas va gazik askitir ? Coba ixam askiyina.
  13. Ise wiyí da proyuca kapbure oviskuca zo guntar, dum afi kapbure mielak zo guntar ;
  14. proyik bene taka tir itakiraf,
    voxe volpeztorik koe mielak lanir.
    Vexe dere kagrupeyé da kottol va mila diweda dir.
  15. Ise koe takra kalliyí : Va mila diweda dam volpeztorik dití ; kle tokdume tiyí loproyaf ? Nume koe takra kaliyí da ware tir greciaca.
  16. Kire nami ke proyik me tir lokotabafi dam teli ke volpeztorik, larde mali moif viel se, kotcoba zo vulkur. Ex, tokcoba ! proyik lidam volpeztorik awalked !
  17. Ise va blira al bogá, kire kotcoba askina leve awalt pu jin volpuveyer, kire kotcoba tir greciuca is sukonkara.
  18. Va kobara jinon askiyina leve awalt is goniskena ta pojara ke tel radimiatas va jin al bogá.
  19. Ise toktan gruper ede titir proyaf ok volpeztoraf ? Wori titir felias va jinafa kotrafa kobara isu ilt ke jinafa proyuca leve awalt. Ware tir greciaca.
  20. Nume, golde jinon askiyina kotrafa kobara leve awalt, va jinafa takra pu volpokolera arldon bildeyé.
  21. Kire mantan proyon is opon is kiewatcon al kobar, nume va ziliduks ke intafa kobara pu meviunsuyus ayik isker. Ware dere tir greciaca is rotacapa.
  22. Keskeon, tokcoba pu ayik kan inafa kobara is abdikerelera ke takra, muka ke inafa cuera leve awalt, zilidur ?
  23. Kot inaf viel anton tir kranav, ise inafa pakara anton tir niga ; dace mielon inafa takra me tildewer. Ware tir greciaca.
  24. Anton tir ayikafa kaluca estuson is ulison is askison da inafa gloga va kiewati vanmiae kobara ropojar ; viele al wí da batcoba va nuba ke Lorik dere daner.
  25. Toktan, keskeon, rotestur ise ropojar, vaxe jin ?
  26. Kire in va proyuca is opa is daava pu ayik agralaf gu in zilir ; voxe va kobara ta kayestara is flavara pu trobasik zilir enide pu tan tis agralaf gu Lorik zilir. Ware tir greciaca is sukonkara.


Kristevafa Biblia : Guazafa Bafela

Koxelet neva

← Koxelet 1 - 2-eaf blokey - Koxelet 3  →

Ara ava se