Batakalamone

Teliz mal Wikikrenteem.

Grablé kal exulera, aneyara

Bat teliz tir kotavaf suterotvildeks vols kalkotavaks.
Ta pomara icde bata telizinda, va Suterotvildeks teliz disukel.

Batakalamone
  Xanto  
Vergumvelt Beyaz kale
Sutesik Orhan Pamuk
Ava Turkiava
Evla 1985


Rupa

Kotcoba tozuwer bak XVII-eafa decemda viele gradilik, mon tolsandaf italiaf grupeik gan turkiaf biratotasik yo zo gralomer. Flintaf koe Istanbul in askir da bevular selaropik nume wetce levetirik pu kulaf "hodja" ayik zo firvir. Levetirik is "felisik" divulon vektad, vexe metol ebler da aflar. Toloy ayik belcon nuvelad funhen is kavanan gan bata vektasaca. Baton sintafa rustayafa gesiara bokawer ise sin va merofolina ikaca kosmad.

Va egara va tcatey ta sultanik taneon zo vajked ; tir buda novesa da va intafa grupaskisuca nedid. Va tuuumara va bartivak flis kare kocalizira azon koaskid ; tir abdumimaks pu sin jekus va rodaxara lodam aliuca. Turkon, webed da va eaftafa eftakolafa konakakola baswelkad baton grikteson va sintafa sposuca gu oviskaf grupeik joke sposuca gu benaskis norlik. Vexe kaliapon, kal volgalafa ruptesuca abicabicon platitisa va sin van sostanuca sintafa gesiara artazukawer. Worara se ke toloy ayik va sultanik tuloriawed, sin va gaderopaxo bulud ise ko vulkunuca vielvielon flaydud. Vexe tiyir vulkuson va polskaf tawuk ke sultanik. Kire geja tiyir kotrafa sin tolon zo yaned. Me ta giwara va blisik se batviele volse ta envilara. Sultanik va grupaskisaceem ke intaf norlaf grupeik se folir ise vajker da sin va tueaftas gejafoalk ravaldutus va encenhera tuuumad. Tel toloy vektasik va geltrara va artowarotaso ervo kle koaskid, voxe ware, rodjera me nuvelar vodafa okaca.


Sebuks

Opeluca robevular afra indon gu suteroteem. Wori tir lit felis viele va "Beyaz Kale" berpot toz belit. Wizbusiki atcesi va krije, dem kalnaris alpoz meviele iskes da obrara ke belisik vantenur. Rupa belcon opelafa is xayesa, soe divmodasa kan watseem is sapuca va dlapera. Luxe koredikeem, me lo wavdaca yo. Orhan Pamuk aname abic suven is skujes koredik grustar.

Bata opeluca nover da sutesik ko swavopa ke koredikeem is belcelaf kapburedeem istar. Min va kuranisuca ke sutesik va jalara va lani tegi se iskeson da intaf rieteem remawir drikon remwit. Keskeon, bak kotafa nega icde gedrafe detce yo me kan rontifa waltegira voxe kan kraf lidok sutesik boyar. Min va vil ke turkiaf sutesik icde gaderopaf ik trakopaf is alkaf uum se baton kosmat. Batcoba kan amidaf koredik, kottan kaatoes va seltki. Min ton vodapafa drunara va seltaygla wal Talteka is Roneka, tulon icde folisuca, va bat berpot rokrafiat. Bata neva, min gildat, me tir grabom ke riyomes islamevik vols suterotik blis iste zvak is batvielon levgas va maletikseem ke mana ilatcewera se is elimon ik ebokon malhedas va noelaca yo. In icde turkiafa araya isu lojadion selt pu min taveper.

Kadime mana lentorafa dumivaca, pwadeson va rupa ke naca wal toloy ayik va sint vektas maneke vaon fereon gojet beka sin tid amidapon xantaf, Orhan Pamuk va belisik icde inafa ayafa gropa erur. Va tokcoba ayik tir ? Berpot tir milconhaf gu voltairekoraf trakopaf reiz yo lize tazukon ice vestanhafa dralha isu kuda in va undera va ayikeemafa zolonaca yo ganer. "Kotugale is kotlize" sedme giltafa muxara. Bat turkiaf suterotik tir witaf (ok radimiwitaf sedme konaktan) is albas va tafura va intaf belisik, is karolas da va vileem is pwadesikeem betar, is aneyas da va belisik kan pwadesa tca yo skalter oke akoyer. Tulon, va abduef ozwaks pu Nilgun Darvinoglu is kostasiki sugdayani gan Faruk Darvinoglu neva dir. Min me grupet toktan bat korik se tid, ise mecoba co-nover da va sinafa tisuca etrakat ede koe "Sessiz Ev", ar berpot suteyen weti konaka tanda, suterotik askiyir da sin tiyid sordaf. Orhan Pamuk va intaf belisikeem kotviele gevar.