Apendi dene Uzbekikeem : Dulzera ke Apendi pu yon Turkik ke Rum

Teliz mal Wikikrenteem.

Grablé kal exulera, aneyara

Apendi dene Uzbekikeem : Dulzera ke Apendi pu yon Turkik ke Rum
Kirgizafa kuda


Baroy korik mal Istanbul kal Marakanda lakiyid aze pu Timur Leng va bata kucilara daykayad :

– Cinaf kottel tanon rigoton gobiber. Ede grupeik ke rinafa coyunta co-lajudulzer, bam va winafa grufa vamoeuca naletev ; edevol dimdenlakitiv.

Timur sersik va batyona kreda naleyer. Va kot grupeik ke patecta isu ezlopik isu izvopik kabelcayar. Vexe mek battan va tanoye emudenikafe bibe lajudulzeyer. Tidion, Timur Leng mibuweyer nume va kofuxedjara va kot grupeik benplekuyur.

– Ede, in kaliyir, koe kota jinon kalfelina gola en tir metan grudulzes va bibe ke batyon emudenik, bam va kot grupeik atatá !

Nume, tan eldik, kutcayas va sid, va bata dragera abdukaliyir :

– Payun Jiomik, voxe ede va Nasr-ed-Din Apendi co-foxiel ?! Bat dulkaf ruptesik, ise anton battel, va yone emudenikafe bibe lajudulzeter.

Timur Leng den Apendi va yon sayakik davon stakseyer. Nume battan piyir.

– Ede, eldik ko oblaka ke Apendi ve kaliyir, va kote bibe ke batyon emudenik, va rinafa taka vox dere tela ke kotbat grupeik giwatal.

Apendi bazeyer da va bibe djuprodulzeyer. Tan ganenik ranhayar aze moe sid ivamukoron conhukayar aze va Apendi disukeyer. Apendi va ivamu tolon solzarteyer aze van in is ganenik geltnediyir.

Toleaf ganenik ranhayar aze va intaf jivot aliedayar aze kan nubeem va eliweem alieyer aze pu Apendi sugdon is zatcon ve nediyir da va dulzera keyer. Apendi siluon ranhayar aze va ato divucorayar aze pu ganenik nediyir aze va jivot aliedayar aze va volaf plozeem ton koneja soakseyer aze ben eliweem va nubokeem plekuyur aze mabotceyer dum tidtalas wil. Bat emudenik, dere mafelasapaf gu gruperapa ke Apendi va inafa kalcenhera welidayar.

Adim bareaf emudenik siluon tiyir nume ranhayar aze va balemoy gelt budeyer aze va sotcen toleagelt madayar. Pu Apendi nediyir aze va dulzera keyer. Me ouladrasuson, Apendi va taneagelt gu toleagelt zokeveyer inde va kaba askiyir nume va ganenik dratceyer. Battan va surtera naleyer nume va Apendi dunuyur.

Akoydapan gan batyona emdavura, Timur sersik, djumalheras is djugildas va batyone zatcafe is sugdafe bibe isu dulzeks va baroy emudenik tupisayar aze eruyur :

– Pu jin kalic, va tokkota rinafa bibera isu seotayana dulzera !

Taneaf grupeik dulzeyer :

– Winaf grupeik tir volmiltaf gruperakirik. Ika yone cinafe bibe va kota dulzera vrutasa va proyucapa is gruperapa al zilir. Mo sid va ivamu conhukason, eruyú ede va anamkuca ke Tawava in foliyir ; va ivamu fuxetolason luxeon di dulzeyer, batinde sugdalason da valev anamkuca ke Tawava gotorigit da bata miala tir abdafa voxe bana rodafa.

Toleaf grupeik batinde pulviyir :

– Jin, kan nubeem va jinaf jivot dasugdason, eruyú lizu kot blisik ke bata tamava pir. In, di dulzeyer da kot blisik male ato al kobliyir aze sin va sint jonkayad. Bata dulzera va jin keldaskinhir.

Bareaf grupeik, ranhason, di kaliyir :

– Jin, va tanoy gelt nedison, djukaliyí : va tanuca ke Lorik kevfolil ? In, va toloy gelt nedison, va jin tutrakodusayar : poke Lorik tir Katcilik. Gan bata dulzera en zo keldaskí.

Moi dulzera ke kot baroy ganenik, Timur va Apendi tagayar aze karzayar da in va yona dulzera pu emudenik pebur. Va kota ziliyina dulzera sebuson, Apendi diveyer :

– Jivot ke taneaf ganenik aelepeyer ; in pu jin eruyur : ede va kotrafa razeka co-dil, va tokcoba co-askil ? Al dulzé : bata miala mu rin is bana mu jin co-tid. Toleaf ganenik dere aeleyer. Pu jin va intaf jivot dere nediyir enide kaliyir : ede va kona sinka koncoba me trasil, bam debala di blokawer ! Pu jin kaliyí da va atomo anton digiyí ise jin dere aelepeyé ise dum zveri djuproyateyé. Luxe bareaf ganenik, in va jin al kovudar : ede va kona sinka pu jin davon me zilil, bam va rinafa ita semá ! in geltnedison kaliyir. Va toloy gelt nedison, va rinaf oral di ceptayá : jinon, batse toloya ita zo sematad ! Ise jinafa kiavara, batse varafa arienta va dulzereem !...

Kore bata pulvira tumevaleapayad, Timur Leng va kot grupeik is taneon bliragiwasi Apendi tunuyayar lodame va sinafa fituluca razdayar.

  Xanto  
Vergumvelt Apendi chez les Özbeks : La réponse d’Apendi aux Turcs de Roum
Sutesik Rémy Dor
Piskura Flies Editions
Ava Francava, malkirgizavaks
Evla 2010
  Kalkotavara  
Vergumvelt Apendi dene Uzbekikeem : Dulzera ke Apendi pu yon Turkik ke Rum
Kalkotavasik Yurani Andergan
Piskura -
Evla 2011
  Krentduga  
Webesik Yurani
Krentduga Image:100%.jpg Tuenayana

Klita is fineyeso piskusikafo internetxo : Flies France Editions