Aleksandr Puckin

Teliz mal Wikikrenteem.

Grablé kal exulera, aneyara
Aleksandr Puckin
1799-1837
Rossiavaf suterotik


Aleksandr Sergeyevitc Puckin tir xantoc ke savsoluafa yasa vey gadikye is ke abisinafe sersikye ("tele Ebeltikye ke Gijaf Piotr") vey gadikya. Dene gadikeem va francafa gaara kazawar abdida ko Tsarskoye Selo ginafa olda zo doster.

In va flibik koe Divexo elda zo player, ixam tison kotgrupaf wetce sutesik va yona foktafa ezla, aze koe Sankt-Peterburg bardon ugalzer lize va yon dekabraf seltom stier ise va rekodafa is perzafa blira jupar. Miledje, va Ruslan is Lyudmila alaakafa ezla (1820) suter. Golde blokxa malyedana dum kevmadana gan ginaf ardial, in koe geefa Rossia koe Ekaterinburg az Kicinev az Odessa (1823) zo divblir.

Koyara ko Kavkaz is Krima, is kosmara va Byron, is listuca ke yon ronyasen patectoy, va Flintik ke Kavkaz (1821) is Baxtcisaray Sul (1823) is Yon tsiganik (1824) yona nyabafa ezla koswad. Bak 1824, in mal Odessa ko Mixailovskoye yasaf pilkot eninteno sokexo zo stakser, lize di antion vols mewemton toldon ugalzer.

Tison enuzes va rossiafa tawa, in va konak blokreiz (Nulin Biptik, is Monama koe Kolomna) bokar ise va yona alaakafa ezla suter ise va taneafa vedeyafa piza Boris Godunov bunyer (sanegatana bak 1831). Bak 1826 Puckin gan Nikolay I-eaf warzaf ginik zo emnagar vexe wan zo tutubizar ise zo eninter. Inaf tanoy zolonaf grabom bak bati olyastewesi bliraki tir Poltava alaakafa ezla (1828).

Bak 1830, ugalzera koe Boldino yasaf pilkot nover da in tolgalter va sutelara va blokberpot Evgeni Onyegin sanegatan bak 1833. Tuke bat berpot sol yona teza ke abdiugal is turestuca ke Byron va int ten tunuyar. Dere bak 1830 va konaka folvama, vanmiae dana tid Mozart is Salieri is Ridolaf Okoldik, ise Yon reiz ke Berkin (Westara warzot isu Warfokdolesik isu Piuteokilik ikz-) suter.

Bak 1831 in va Natalia Gontcarova kurer. Tison bozakirapaf ise turkon kosaf gu yona anamefa skudjera, koe zivolaf is skaltaf alpoz ke aboyikeem vligus va inafa norluca daletoe di blir. Konak inaf grot batsareon wori evlad : Iyekotaf Okolik ezla (1833), is Dicimafe Sersikye (1834) kotgrupaf warzot lize geltreva is tacukuca kalaotcewed, is Nazbeikya ke Redakik (1836) berpotam koswayan gan kevmadara ke Pugatcev.

Bak 1837 in yoke bakara bal toldoalie kev Georges d’Anthès francaf jotaf oluik xonukar. Feliik ke warzot, is taneaskisik va piza is izvaberpot, is norlaf ikapulvisik va rossiafa gloga, is merodolunen ezlopik, Puckin va koti suterotoxi en al tcalar ise va yanbamuxaxo al tulomantar.

Inaf nelkaf vanbureks rotir al tir redura va opelaf is liaf is tamaf warzaf avot. Va gijuca ke inafa ezlafa cora, is va melzucapa ke blokeem, is va mergilrabuduca ta pimtara is tiavera, is va tolredura va bli kan yamba dere setiket. Dene rossiavaf suterotikeem, Puckin arse tir tel loon turestayas va kotaf vedeyaf suteroteem. Neke, sedme intaf muxaks, va "opelaca" anton opelon djukaliyir.


Aleksandr Puckin

Aleksandr Puckin
 Blira 1799-1837
 Ava Rossiava
 Suterind Ezlopa, Berpot
  Suterot

  • Руслан и Людмила (1820) - Ruslan is Lyudmila
  • Кавказский пленник (1821) - Flintik ke Kavkaz
  • Бахчисарайский фонтан (1823) - Baxtcisaray Sul
  • Цыганы (1824) - Yon tsiganik
  • Полтава (1828) - Poltava
  • Моцарт и Сальери (1830) - Mozart is Salieri
  • Домик в Коломне (1830) - Monama koe Kolomna
  • Граф Нулин (1831) - Nulin Biptik
  • Борис Годунов (1831) - Boris Godunov
  • Евгений Онегин (1833) - Evgeni Onyegin
  • Медный всадник (1833) - Iyekotaf Okolik
  • Скупой рыцарь (1834) - Dicimafe Sersikye
  • Капитанская дочка (1836) - Nazbeikya ke Redakik
  • Пир во время чумы
  • Русалка
  • Гавриилиада
  • Песни западных славян
  • Братья разбойники
  • Каменный гость
  • Анджело
  • Вадим
  • История Пугачева
  • Дубровский
  • Пиковая дама
  • Повести Белкина
  • Арап Петра Великого
  • Египетские ночи
  • История села Горюхина
  • Кирджали
  • Марья Шонинг
  • На углу маленькой площади...
  • Гости съезжались на дачу...
  • Повесть из Римской жизни
  • Роман в письмах
  • Рославлев
  • Сцены из рыцарских времен
  • Езерский
  • Тазит