Albert Camus

Teliz mal Wikikrenteem.

Grablé kal exulera, aneyara
Albert Camus

1913-1960
Francavaf suterotik

 Nobel Suterotafo Poradro : 1957


Albert Camus tir francaf suterotik isu trakopik : berpot, warzot, wenya, trakopaxa, felaxa.


1913-1932 : Kimtaf rumeugal

Albert Camus koe Mondovi (re Aljazaira) ba 7/11/1913 koblir. Tir taneaf nazbeik ke Lucien Camus, tawamiduraf dodelik, is Catherine Sintes, jotafa zanisikya vey espanafa xanta megrusutesa is wavdon muxawesa. Lucien Camus bak Taneafa Tamavafa Geja zo tixar nume bak Marne Meld di awalker. Jotaf Albert va gadikye me di grupeyer. Gadikya ko tana wawafa revava ke Aljazair, Belcourt, bam inkewer. Tuke pomara ke tan tavesik, Albert Camus va filav seotar nume koe Bugeaud olda ke Aljazair batkane wan rovayar. Va daava va nugaviputi (vanpis ribasusik) is trakopa kosmar. Aze kotcakoler, batdume va cugadob va trakopa me di tcilkar.


1932-1944 : Sayudasik is acagisik

Bak 1932 va ekul seotar aze va trakopa toz vayar. Battandon koe kotlafa virda va konak taneaf teliz sanegar. Bak 1934 va Simone Hié kurer ise ta fukorlara va vayara is pomoyara va olegara ke tolonga va konaka exavama goksuber. Bak 1935, va doevafo pako yoter voxe arti tolda bulutur. Bak 1936, miledje gu trakopa zo dobar, va Wenya ke Kobara redur ise do baroy nik va Révolte dans les Asturies (Kevmadara koe Asturias), va kopoutuna drunta. Va jontika drunta zirser ise zaler : Vligurugal ke André Malraux, is Wadra ke Gorki, is Karamazov baroye berikye ke Dostoyevski. Bak 1938, vanpir felik koe Alger-Républicain fela lize va yon aljazairaf gaderopaf jiz tulon gomunester.

Walvedeyafa debala sotcewer. Alger-Républicain ten awir nume Albert Camus ko Paris mallapir lize dene Paris-Soir zo vilter. Va Simone Hié solyerumar, aze in va Francine Faure tolyerumar.

Bak 1942, vanmiae acagis lizor sayudar ise va yon teliz ko Combat fela sanegar. Battandon, dene Gallimard va L'étranger (Diveik) is Le mythe de Sisyphe (Vund va Sisifos) sanegar. Bata toloya neva va jontik jotaf belisik koteyad nume batviele Albert Camus va fiuntuca vansar.

Bak 1944, va Jean-Paul Sartre kakever. Bantel galper da in va Huis clos (Ton budeyen tuvel) drunta di konakilar. Batugale toloy trakopik non skedad : "mafelafa etekara va korik is grabom" ~ Sartre icde Camus suter. Soe skedara di blokapar.


1945-1957 : Viltes vrutasik

Bak 1945, tir redura va Caligula. Kaiki tolda, va kiewatcapaf La peste (Keftakola) berpot sanegar. Battandon va Combat fela bulur.

Bak 1951, sanegara va L'homme révolté (Kevienik) va belcafa glebara ke yon vamoegeltrevik isu kruldevik gu Camus vodar. Taneon ke yon vamoegeltrevik : André Breton tir yatkaf gu konaka draga icde Lautréamont is Rimbaud. Luxe kruldevik, sin evied, sanegason va malyopapas teliz koe Les temps modernes, koe virda gadena gan miv Sartre. Arti tanda, kaljoara wal Camus is Sartre di tir.

Batugale Camus va Aljazairafa debala kranavepeson blidar. Koe Express fela kan konak teliz kotirkar lize nedir da va bata piza dum "ilkafa volkalaca" blidar. Ko Aljazair ta kabera va tolnepalera dace di lapir. Giopon. Bak 1956, va La chute (Akeoyera) sanegar ; va sonus is xayes grabom golde oxuca is rotatrakusuca.


1957-1960 : Nobel poradro is awalkera

Bak 1957 Albert Camus va L'exil et le royaume (Divblira is Gazaxo) sanegar, larma dem tevoy warzot icde bali. Va Nobel suterotafo poradro bak saneaksat ke 1957 zilukur, joke "varaf grabom kolupuson koafis va zvakeem batugale sokis tori ayafa jiluca". Bam tir 44-daf is gablen lerdeaf francik. Va dewitca gu Louis Germain tarizar, gu tavesik noveyes da wan vayayar. Gan konak miltik zo sendar : tulon Roger Martin du Gard is François Mauriac is William Faulkner. In wori batcer : co-galpeyer da bata poraca pu André Malraux krupten dum feliik zo yofter. Kaiki barda, ba 04/01/1960 bal diremwalta xonukar. Bali. Koe direm metenukeyes nubasuteks va Le premier homme (Taneaf ayik) di zo trasir.

Ozwaks

Albert Camus va konak grupecken ozwaks al isker.


Albert Camus

Albert Camus
 Blira 1913-1960
 Ava Francava
 Suterind Berpot, Wenya
  Suterot

  • Révolte dans les Asturies (1936)
  • L'Envers et l'Endroit (1937)
  • Caligula (1938)
  • Noces (1939)
  • Le Mythe de Sisyphe (1942)
  • L'Étranger (1942)
  • Le Malentendu (1944)
  • La Peste (1947)
  • L'État de siège (1948)
  • Les Justes (1949)
  • Actuelles I, Chroniques 1944-1948 (1950)
  • L'Homme révolté (1951)
  • Actuelles II, Chroniques 1948-1953
  • L'Été (1954)
  • La Chute (1956)
  • L'Exil et le Royaume (1957)
  • Réflexions sur la peine capitale (1957)
  • Actuelles III, Chroniques algériennes, 1939-1958 (1958)