Difference between revisions of "KanakafaVunda Idara katcilikya"

VII : Idara katcilikya

Idara katcilikya vleve wageyaal debanyeyer.

Anameon yikya stasa va sielstutera tigid.

Kabdueon yikye edgardavalud viele inya stivawer ise enide tildewer ise zo permur.

Pokeon guazik is gejik tigid ; titeon rumeik is ayikya.

Idara tir nazbeikya ke grelteem, va paokik do budik al kevalier.

Idara tir gadikya ke yon gradilik ; va sinaf bakaks kan roxanyana toa ke taelaftason yestana gefesta gasuper. Va tuidulasa buis uliwa zilir ; va sin kan dioladank dere kokeniber.

Terektac guazikye, Idara fu pulvir !

Va art dem skotcas talgeem dem griopayan uul fenkur. Viele batakik koe yona guemapa al artlapid, va sin al rotapsav kire kan gleba dilfuyud voxe va tceka is zminta is raporkufta anton digiyiv.

Va yon intaf fay ko greltafa tawa al faytawed ; va yona raporwida den yon krant al kolnad lize poke voa is wageyaalxo mu telyona cinafa kiblayad : vleve pist bravatas va guema.

Batakik va krant dem jontik bilkaal isu sfi is va mevta besayana gu nod al wid ; va kot tillit ke kiray al wid ise vliguson al disuked.

Batakik kene bostap al gozad ise va cinaf midureem al saad ! Vexe win va yon gor ta tawafenkura digic ! voxe cin va peya is tey is kufta anton digiv !

Ede win gu antaf tuwava rob zo levkimac ; kas lodote dam cin co-tic ?

Ise beta tid winafa kulaca, va cin gu koncoba godjumac, larde mal bana domega ke uzdapa kal greltxo lapic.

Va win al kevaliev ise al rotapsav, va win artlapis is koilkas va cinafo vo.

Va win wan kevalietev ise wan rotapsatav. Vexe toktan va win star ? Ise toka sukara va yona winafa guema al platir ?

Kas kot grelt ke tamava remo kota bira kotviele kotlizu va sint aotced ?

Sukec, ey yik, ko edgardaval ! Idara al pulvir !

Guazik, govoreizuc, grelt kalterektar !